Azərbaycanda fəaliyyət göstərən “İnci” şirkətlər qrupunun Türkiyədəki qolu olan “Cassa” şirkəti İstanbulda keçirilən Beynəlxalq Ofis və Dəftərxana ləvazimatları sərgisində iştirak edir. Sərgiyə dünyanın bir çox ölkəsindən çoxlu sayda şirkətlər qatılıb, böyük sayda ziyarətçi kütləsi müşahidə edilir. 

Azərbaycanlı iş adamı Mikayıl Yusif tərəfindən 2010-cu ildə yaradılmış “Cassa” şirkəti sərgidə öz stendində Türkiyə-Azərbaycan qardaşlığını göstərən guşə də yaradıb. Bu guşədə hər iki ölkənin bayraqlarının əks olunması ilə bərabər, "Qarabağ Azərbaycandır" şuarı yazılıb. "İnci" şirkətlər qrupundan Marja-ya verilən məlumata  görə, şirkətin stendinə yaxınlaşan ziyarətçilər guşəyə dəvət olunur, onlara Azərbaycanın Vətən müharibəsindəki qələbəsi, bu qələbənin qazanılmasında qardaş Türkiyənin mənəvi dəstəyi, Qarabağın tarixi Azərbaycan torpağı olduğu, 30 ilə yaxın Ermənistanın işğalı altında qaldığı, bu ərazilərin dağıdıldığı, tarixi, dini abidələrimizin məhv edildiyi barədə məlumatlar verilir. Həmçinin hər bir ziyarətçi ilə xatirə olaraq bu guşə qarşısında şəkil çəkdirilir. 

Şirkətdən məlumat verilib ki, "Cassa" məhsulları Türkiyənin ofis və dəftərxana ləvazimatları bazarında satış həcminə görə birinci yerdədir. Bu qürurverici uğurun arxasında geniş çeşiddə keyfiyyətli məhsullar, satışın düzgün qurulması, geniş biznes əlaqələri dayanır. Sərgi zamanı məhsulların ixracına dair danışıqlar aparılıb və razılaşmalar əldə olunub. 

Qeyd edək ki, “Cassa” şirkəti İstanbulda istehsal sahəsini qurub, burada ofis və dəftərxana ləvazimatlarının istehsalını həyata keçirir. Məhsullar 30-dan artıq ölkəyə, o cümlədən Azərbaycan, İsrail, Yunanıstan, İtaliya, İspaniya, Portuqaliya, Almaniya, Serbiya və Bolqarıstana ixrac olunur.

“Cassa” markalı ofis və məktəb ləvazimatlarının Azərbaycanda məxsusi satış hüququ “İnci” şirkətlər qrupuna aiddir. Azərbaycanda fəaliyyət göstərən “Ofisait” mağazaları “İnci” şirkətlər qrupuna daxildir.