Azərbaycanın onlayn ödəmə bazarında ən böyük şirkət olan GoldenPay və STEP IT Academy arasında tərəfdaşlıq və əməkdaşlıq memorandumu imzalanıb.

GoldenPay tərəfindən memorandumu idarə heyətinin sədri sədri Naina Mehdiyeva, Akademiya tərəfdən isə direktor Aleksey Sleptsov imzaladyıb.

GoldenPay şirkətinin yaydığı məlumatda bildirilir ki, GoldenPay və STEP IT Academy arasında memorandumun imzalanması informasiya və kommunikasiya texnologiyaları sahəsində təhsilin davamlı inkişafı, İKT sahəsində maarifləndirici proqramların icrası, elm, təhsilə bağlı müxtəlif layihələrə dəstəyin verilməsi və bu sahənin geniş ictimaiyyət arasında birgə tanıtımı üçün əhəmiyyətli şərait yaradır.

Razılaşma çərçivəsində GoldenPay nümayəndələri müvəffəqiyyətli tələbələri təcrübəyə və işə cəlb etmək məqsədilə tələbələrin təhsil prosesində və imtahanlarında da iştirak edə bilərlər. Sənəd eyni zamanda seminar, konfrans və digər birgə tədbirlərin təşkilində ekspert və analitik dəstək verilməsini tənzimləyir.

Fəaliyyətə başladığı gündən bu yana yüzlərlə xidmətin qoşulduğu GoldenPay vasitəsilə milyonlarla manatlıq onlayn ödənişlər həyata keçirilmişdir. Eyni zamanda GoldenPay Azərbaycanda fəaliyyət göstərən bir çox bank xidmətlərini də təklif edir.

STEP IT Academy 1999-cu ildən fəaliyyət göstərir və kompüter təhsili üzrə ixtisaslaşmış beynəlxalq təhsil müəssisəsidir.  Akademiya Azərbaycan da daxil olmaqla dünyanın 20 ölkəsində fəaliyyət göstərir və ümumilikdə 30 min tələbə və 85 min məzuna sahibdir.

Qarşılıqlı əməkdaşlıq gənclərin inkişafı və təhsilin təşviqi üçün yeni imkanlar yaradacaqdır.

Azərbaycanda ən böyük onlayn ödəmələr şirkəti GoldenPay 2007-ci ilin iyul ayında yaradılıb. Şirkət texniki işlərin yekunlaşması, “Visa” və “MasterCard” beynəlxalq ödəniş sistemlərindən müvafiq sertifikatların alınmasından sonra 2008-ci ilin dekabr ayında fəaliyyətə başlayıb.

2011-ci ilin aprel ayında GoldenPay şirkəti Hesab.az - Azərbaycanın ən böyük onlayn xidmətlər platformasını yaradıb. Hesab.az-da müxtəlif kommunal, stasionar və mobil rabitə, internet, bank kreditlərinin ödənişi, onlayn sığorta, kinoteatra bilet və sair xidmətlərin alışı /ödənişi mümkündür.