Yapı Kredi Bank Azərbaycan 2017-ci ilin 1-cü rübünü 2 milyon 18 min manat xalis mənfəət ilə başa vurub.

“Marja” xəbər verir ki, bu ilin yanvar-mart dövründə Bankın cəmi gəlirləri 14 milyon 737 min manat, o cümlədən faiz gəlirləri 8 milyon 36 min manat, qeyri-faiz gəlirləri 6 milyon 701 min manat təşkil edib. Xərclər çıxıldıqdan sonra Bankın 5 milyon 376 min manat əməliyyat mənfəəti qalıb. Əməliyyat mənfəətinin 3 milyon 463 min manatı aktivlər üzrə mümkün zərərlərin ödənilməsi üzrə yaradılan ehtiyata ayırılıb. Nəticədə Bank ilk rübdən 2 milyon 18 minmanat xalis qazancla çıxıb.

Qeyd edək ki, Bank 2016-cı ili ehtiyatlara 30 milyon manat ayırdığından ili 10 milyon 328 min manat zərər ilə bağlamışdı.

Yapı Kredi Bank Azərbaycan 31 Mart 2017-ci il tarixinə 441 milyon 900 min manat cəmi aktivlərə, 388 milyon 957 min manat cəmi öhdəliklərə və 52 milyon 942 min manat cəmi kapitala malik olub. Bank ötən ilin sonunda 443 milyon 90 min manat cəmi aktivlərə, 392 milyon 166 min manat cəmi öhdəliklərə və 50 milyon 924 min manat cəmi kapitala malik idi. Bankın cəmi aktivləri əsasən müştərilərə verilən kredtlərin 212 milyon 296 min manatdan 190 milyon 588 min manata geriləməsilə əlaqədar azalmışdır.

Diqqəti cəlb edən Bankda əhalinin əmanətlərinin artmasıdır. İlk rübdə Yapı Kredi Bank Azərbaycanda əhalinin əmanətləri 5,1% və ya 3 milyon 571 min manat artaraq 70 milyon 711 manatdan 74 milyon 282  min manata qalxmışdır.

31 Mart 2017-ci il tarixinə olan məlumata görə, 190 milyon 588 min manat kredit portfelinin 26%-i və ya 49 milyon 551 min manatı problemlidir. Lakin Bank verilmiş kreditlər üzrə 55 milyon 154 min manat ehtiyat yaratdığından ödəmə vaxtı keçmiş 49 milyon 551 min manatlıq kredit artıqlaması ilə bağlanır.

"Yapı Kredi Bank Azərbaycan" QSC-nin əsas səhmdarları Türkiyənin ən böyük banklarından biri "Yapı Kredi"nin və Avropanın böyük bank qruplarından biri UniCredit-dir.

0% KREDİTLƏ OFİS MEBELİ!