"Aqrarkredit” Qapalı Səhmdar Cəmiyyəti Bank olmayan Kredit Təşkilatının ("Aqrarkredit” QSC) rəhbərliyi ilə Asiya İnkişaf Bankının Azərbaycan nümayəndəliyinin rəhbərliyi arasında videokonfrans keçirilib.

Videokonfransın əsas məqsədi "Aqrarkredit” QSC ilə Asiya İnkişaf Bankı arasında əməkdaşlığın qurulması, gələcək perspektivdə bir sıra layihələrin birgə icrası olmuşdur.

Görüş zamanı "Aqrarkredit” QSC-nin İdarə Heyətinin sədri Məmməd Musayev çıxışında "Aqrarkredit” QSC-nin ölkənin kənd təsərrüfatına kredit xidməti göstərən ən böyük maliyyə qurumlarından biri olduğunu qeyd edib və onun son illərdəki fəaliyyəti barədə ətraflı məlumat verib. Kredit təşkilatı fəaliyyətində beynəlxalq maliyyə qurumları, xarici ölkələrin maliyyə təşkilatları və onların Azərbaycan nümayəndələri ilə əməkdaşlığa xüsusi əhəmiyyət verdiyini bildirən Məmməd Musayev kredit təşkilatının beynəlxalq əlaqələrdə böyük təcrübəyə malik olduğunu, bir çox kənd təsərrüfatı layihələrinin icrasını uğurla başa vurduğunu, elə bu çərçivədə Asiya İnkişaf Bankı ilə əməkdaşlıq etmək niyyətində olduqlarını vurğulayıb.

Asiya İnkişaf Bankının Azərbaycan nümayəndəliyinin rəhbəri Nariman Mannapbekov isə çıxışında birgə layihələrin həyata keçirilməsi üçün ölkədə münbit şəraitin mövcud olduğunu vurğulayıb. Bu aspektdə Asiya İnkişaf Bankı olaraq "Aqrarkredit” QSC ilə gələcək əməkdaşlığa önəm verdiklərini və kredit təşkilatının fəaliyyəti barədə son illərin maliyyə hesabatları ilə daha yaxından tanış olmaq istədiklərini bildirib.

Videogörüşdə "Aqrarkredit” QSC-nin və Asiya İnkişaf Bankının Azərbaycan nümayəndəliyinin digər əməkdaşları da gələcək əməkdaşlıq barədə konkret addımlarla bağlı öz fikirlərini bildiriblər.

İclasın nəticəsinə əsasən, tərəflər arasında 10 gün sonra yeni görüşün keçirilməsi və əməkdaşlıq barədə memorandum imzalanmasının məqsədəuyğunluğu vurğulanıb.