“Atəşgah Həyat”ın xalis mənfəəti artıb

“Atəşgah Həyat”ın xalis mənfəəti artıb

“Atəşgah Həyat Sığorta Şirkəti” ASC 2019-cu ili 6 milyon 961 min manat xalis mənfəət ilə başa vurub. Bu, 2018-ci illə müqayisədə 5,8% çoxdur. Belə ki, “Atəşgah Həyat Sığorta Şirkəti” ASC 2018-ci ili 6 milyon 604 min manat xalis mənfəətlə bağlamışdı.

GƏLİRLƏRİ ARTIB

Marja şirkətin maliyyə göstəricilərinə istinadən xəbər verir ki, ötən il “Atəşgah Həyat”ın cəmi gəlirləri 36 milyon 942 min manat, cəmi xərcləri isə 28 milyon 240 min manat təşkil edib. Şirkət 8 milyon 702 min manat əməliyyat mənfəətindən 1 milyon 740 min manat mənfəət vergisi ödəyib.

Müqayisə üçün qeyd edək ki, 2018-ci ildə “Atəşgah Həyat Sığorta Şirkəti”nin cəmi gəlirləri 31 milyon 619 min manat, cəmi xərcləri isə 23 milyon 364 min manat təşkil etmiş, 8 milyon 255 min manat maliyyə mənfəətindən 1 milyon 651 min manat mənfəət vergisi ödənmişdi.

İllik müqayisədə “Atəşgah Həyat”ın topladığı sığorta haqları 2018-ci ildəki 60 milyon 104 min manatdan 2019-cu ildə 39 milyon 204 min manata geriləyib, sığorta ödənişləri isə 14 milyon 740 min manatdan 19 milyon 363 min manata yüksəlib. Sığorta haqlarının azalmasına baxmayaraq cəmi gəlirlərin artması Şirkətin sığorta ehtiyatlarına ayırmasının 31 milyon 729 min manatdan 6 milyon 330 min manata düşməsi ilə bağlıdır.

Sığorta haqlarının azalması vergi qanunvericiliyinə edilmiş dəyişikliklərin ötən ilin əvvəlindən qüvvəyə minməsilə əlaqədardır.

İNVESTİSİYA GƏLİRLƏRİ ARTIB

2018-ci illə müqayisədə 2019-cu ildə “Atəşgah Həyat”ın investisiya gəlirləri 49% artaraq 4 milyon 6 min manat təşkil edib.

ŞİRKƏT BÖYÜYÜB

31 Dekabr 2019-cu il tarixində “Atəşgah Həyat” 97 milyon 476 min manat cəmi aktivlərə malik olub. Şirkət 2018-ci ilin sonunda 89 milyon 427 min manat cəmi aktivlərə malik idi.

03.04.2020 08:21

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az