Azərbaycanda  avtonəqliyyat vasitəsi sahiblərinin mülki məsuliyyətinin icbari sığortası (icbari avtomobil sığortası) üzrə hesablanmış sığorta ödənişləri hesablanmış sığorta haqlarından daha sürətli artır. Bu vəziyyət icbari avtomobil sığortasında zərərliliyi artırır və yaxın gələcəkdə tariflərin artırılacağı ehtimalını gücləndirir.

“Marja” Maliyyə Bazarlarına Nəzarət Palatasının aylıq statistikasına istinadən xəbər verir ki, 2018-ci ilin 9 ayı ilə müqayisədə 2019-cu ilin 9 ayında avtonəqliyyat vasitəsi sahiblərinin mülki məsuliyyətinin icbari sığortası üzrə hesablanmış sığorta haqları 3 milyon 644 min manat artarkən, sığorta ödənişləri 3 dəfəyə yaxın çox – 10 milyon 398 min manat artıb.

İcbari avtomobil sığortası üzrə yığımlar ötən ilin yanvar-sentyabr dövründə 72 milyon 554 min manat ikən, bu ilin eyni dövründə 76 milyon 198 min manat təşkil edib.

Ötən ilin yanvar-sentyabr dövründə 38 milyon 303 min manat təşkil etmiş sığorta ödənişləri, bu ilin eyni dövründə isə 48 milyon 700 min manat təşkil edib.

Sığorta ödənişlərinin sığorta yığımlarında xüsusi çəkisi 53%-dən 64%-ə yüksəlib. Eyni zamanda, sığorta şirkətləri işlərin aparılması, komissiyaların ödənilməsi üzrə xərclər çəkirlər. 

Maliyyə Bazarlarına Nəzarət Palatası sığorta şirkətlərinin agentlərə qanunsuz faizlər ödəməsinə  qarşı mübarizə apardığını bildirir. Digər tərəfdən icbari avtomobil sığortasının onlayn alış imkanı yaradılıb ki,bu zaman agentə ehtiyac olmaya bilir. Qanunsuz faizlərə qarşı mübarizəyə və onlayn satışa keçidə baxmayaraq xərclər azalmır. Qeyd edək ki, artıq onlayn satışın da sığorta agentlərinin nəzarətinə keçdiyi müşahidə edilir. İcbari sığortanı vətəndaşlar özləri deyil, agentlər vasitəsilə onlayn alırlar.

İcbari avtomobil sığortası üzrə tariflər devalvasiyalardan əvvəl təsdiq edilib. Devalvasiyalardan sonra avtomobillər, onların ehtiyat hissələri və təmir xərcləri bahalaşsa da tariflər sabit saxlanılıb.

Bu ilin İyun ayında Beynəlxalq Sığorta Forumunda Maliyyə Bazarlarına Nəzarət Palatasının (MBNP) sədri vəzifəsini icra edən İbrahim Alışov bildirmişdi ki, Palata Sığortaçılar Assosiasiyası ilə birgə əsas sığorta növləri üzrə tariflərə yenidən baxılmasına dair təkliflər hazırlanır, çünki onlar günün tələblərinə cavab vermir. 

"Burada oturan aktuarilərimiz də razılaşarlar ki, əsas sığorta məhsulları üzrə tariflər günün tələblərinə cavab vermir. Biz artıq onlara dəyişiklik edilməsi üçün təkliflər hazırlayırıq və bu istiqamətdə Sığortaçılar Assosiasiyası ilə birlikdə işləyirik", - İbrahim Alışov söyləmişdi.

İ.Alışov qeyd etmişdi ki, hazırda bazarda risklərin qiymətləndirilməsi kifayət qədər aşağı səviyyədədir və bu, sığortalıların vahid reyestrinin olmaması ilə əlaqədardır:

"Biz artıq model seçmişik və belə bir reyestr yaratmağa başlamışıq, vahid reyestr bazarın şəffaflığını artırmağa imkan verəcək və sığorta şirkətlərinin risklərini idarəetmənin təkmilləşdirilməsi üçün mühüm addım olacaq”.