Dünya Bankı (DB) məşğulluğun dəstəklənməsi layihəsinin həyata keçirilməsi üçün Azərbaycana 100 mln. dollar məbləğində kredit ayıra bilər.

“Azərbaycan hökuməti belə bir layihə üçün kredit almaq məqsədi ilə Dünya Bankına rəsmi müraciət edib. Kreditin məbləği təxminən 100 mln. dollar təşkil edir”, – deyə vəziyyətlə tanış olan hökumətdəki mənbə  bildirib.

Onun sözlərinə görə, layihənin təfsilatları Azərbaycanın Əmək və Əhalinin Sosial Müdafiəsi Nazirliyi və DB nümayəndələri arasında hələ müzakirə ediləcək.

Məlumata görə, DB-nin Direktorlar Şurası bu layihə üçün kreditin ayrılmasını 2020-ci ilin mart ayında təsdiqləyə bilər.

Təklif olunan layihə Azərbaycan əhalisinin iş axtaran həssas qrupları: gənclər, qadınlar, məcburi köçkünlər, əlillər və təhsil səviyyəsi aşağı olan insanlar arasında məşğulluqla bağlı vəziyyətin yaxşılaşdırılmasına yönəldilib.

Layihə üç komponentdən ibarət olacaq: özünüməşğulluq proqramının əhatə dairəsi və səmərəliliyinin artırılması; işlə təmin etmə xidmətlərinin həyata keçirilməsi üçün Dövlət Məşğulluq Xidmətinin potensialının gücləndirilməsi; layihənin idarə edilməsi, monitorinq və qiymətləndirmə.

Xəbər verildiyi kimi, Əmək və Əhalinin Sosial Müdafiəsi Nazirliyi 2019-cu ildə özünüməşğulluq tədbirlərinin təşkilinə 56 milyon 41 min manat (cari məzənnə ilə 33 milyon dollar) yönəltməyi planlaşdırır.

2018-ci ildə proqram 6 min ailəni əhatə edib, 2019-cu ildə 8-10 min ailəni, 2020-ci ildə 15 minədək ailəni əhatə edəcək. Proqramın məqsədi insanların həyat səviyyəsini yaxşılaşdırmaq, kiçik sahibkarlığın inkişafına təkan verməkdən ibarətdir. Proqram aztəminatlı ailələr üçün nəzərdə tutulub. Belə ailələr kənd təsərrüfatı texnikası, avadanlıq və mal-qara ilə təmin olunur.

Azərbaycan 1992-ci ildən DB-nin üzvüdür. Bu günədək bank 54 layihənin həyata keçirilməsi üçün respublikaya ümumilikdə 3,4 milyard dollar məbləğində kredit ayırıb.

GƏLİRİN SƏNİ QANE ETMİRSƏ, HƏR SANİYƏ QAZANA BİLƏCƏYİN YATIRIMA BAŞLA!

© “İnterfaks-Azərbaycan”