“Azərbaycan Sənaye Korporasiyası” ASC-nin törəmə müəssisə olan “Azərtütün ASK” MMC və fermerlər arasında görüşlər keçirilib.

MMC-dən “Marja”ya daxil olmuş məlumatda bildirilir ki, keçirilən görüşlər zamanı məhsul istehsalı ilə əlaqədar fermerlərə verilən güzəştli kreditlərin müddətinin uzadılması, tütün istehsalçılarına verilən subsidiyaların məbləğinin artırılması, həmçinin toxum, texnika və su təminatının yaxşılaşdırılması, xüsusi ilə də yaşıl tütünün alış qiymətinin artırılması xahiş olunub.

Qeyd olunanları nəzərə alaraq, 2019-cu ilin istehsal mövsümündə keyfiyyətli tütün tədarükünün stimullaşdırılması və tütün əkinlərinə marağın artırılması məqsədi ilə “Azərtütün ASK” MMC tərəfindən cari ildə yaşıl tütünün tədarük qiymətlərinin müvafiq olaraq 1-ci sort – 1kq – 0.27 AZN; 2-ci sort - 1kq - 0.18 AZN həddində müəyyən edilməsi məqsədəuyğun hesab edilib. Yaşıl tütünün alış qiymətlərinin artırılmasına Kənd Təsərrüfatı Nazirliyi tərəfindən müsbət rəy bildirilib.

 “Azərtütün ASK” MMC tərəfindən 2019-cu ilin mövsümündə Şəki, Qax, Zaqatala və Balakən rayonlarında 1800 ha sahədə “virciniya botaniki” növündən olan yaşıl tütünün istehsalı və tədarükü üzrə 229 fermerlə (istehsalçı) ilə müqavilələr bağlanıb. Müqavilə şərlətinə görə, tədarük edilən 1 kq yaşıl tütün məhsulu üzrə 1-ci sort tütün - 0.25 AZN/kq, 2-ci sort – 0.17 AZN/kq və 3-cü sort – 0.10 AZN/kq nəzərdə tutulmuşdu.

Beləliklə, 1-ci sort tütünun alış qiyməti 2 qəpik, 2-ci sort tütünun alış qiyməti isə 1 qəpik artırılıb.

Bununla yanaşı fermerlərin dəstəklənməsi üçün  “Azərtütün ASK” MMC tütün istehsalçıları ilə sıx əməkdaşlıq şəraitində fəaliyyət göstərir və bütün istiqamətlər üzrə mümkün olan dəstək tədbirləri təmin edilir.  Belə ki, fermerlərin toxum və gübrə tələbatı təmin edilib, “ASK” ASC-nin zəmanəti ilə hər hektar üçün 1700 azn olmaqla 181 fermerə kredit xətləri açılıb, aqrotexniki tədbirlərin görülməsinə Cəmiyyətin mövcud texniki resursları cəlb edilib, mütəxəssislər tərəfindən tütünün əkilməsi və becərilməsi sahəsində istehsalçılara zəruri dəstək göstərilib, aqrotexniki qaydalara riayət edilməsi məsələləri nəzarətdə saxlanılıb, fermerlərə təlimlər keçirilib, yerindəcə lazımi metodiki məsləhətlər verilib, həmçinin tütünün müasir tələblərə uyğun becərilməsinə dair təlimatlar hazırlanaraq onlara təqdim edilib.