Azərbaycanın iri sement istehsalçılarından biri olan “Norm” MMC 2018-ci ili 34 milyon 806 min manat xalis mənfəət ilə başa vurub. Müqayisə üçün qeyd edək ki, “Norm” 2017-ci ili 34 milyon 689 min manat xalis mənfəət ilə bağlamışdı. Beləliklə, illik müqayisədə “Norm”un xalis mənfəəti cüzi artıb.

“Marja” şirkətin illik hesabatına istinadən xəbər verir ki, 2017-ci ildə sement satışından gəlir 126 milyon 272 min manat ikən, 2018-ci ildə 149 milyon 447 min manata qalxıb (18,3% artıb). Eyni zamanda, satışın maya dəyəri 75 milyon 693 min manatdan 86 milyon 973 min manata yüksəlib (15% artıb).

Gəlirlərin xərclərdən daha çox artması mənfəətin artmasında da əks olunub. 2017-ci illə müqayisədə ötən il mənfəət vergisindən əvvəlki mənfəət 24,7% artaraq 43 milyon 328 min manat təşkil edib. Ötən il “Norm” MMC 8 milyon 522 min manat mənfəət vergisi ödədiyindən mənfəəti 34 milyon 806 min manata düşüb. “Norm” 2017-ci ildə cəmi 42 manat mənfəət vergisi ödəmişdi. 2018-ci ildə mənfəət vergisinin ödənilməsi xalis mənfəətin daha çox artmasına imkan verməyib.

“Norm” MMC-nin rəqibi “Holcim Azərbaycan” ASC-nin də ötən il satışdan gəlirləri artıb. Amma cəmi gəlirləri “Norm”dan azdır.

Xəbər verdiyimiz kimi, 2017-ci illə müqayisədə 2018-ci ildə “Holcim Azərbaycan”ın satışdan gəlirlər 9 milyon 334 min manat və ya 8,7% artaraq 116 milyon 332 min manat təşkil edib. “Holcim Azərbaycan” 2018-ci ili 7 milyon 67 min manat xalis mənfəət ilə başa vurub. ASC 2017-ci ili 1 milyon 759 min manat xalis mənfəət ilə bağlamışdı.

2018-ci ildə “Norm” MMC  “Holcim Azərbaycan”dan daha çox gəlir və xalis mənfəət əldə edib. Ötən il “Norm” “Holcim Azərbaycan”dan təxminən 5 dəfə çox xalis mənfəət qazanıb. 

Qeyd edək ki, Azərbaycanda “Norm” və “Holcim Azərbaycan” ilə bərabər Qazax Sement Zavodu (Akkord Cement) və Naxçıvan Sement Zavodu da sement istehsalı ilə məşğul olurlar.