Azərbaycan Respublikası Dövlət Toxum Fondu Beynəlxalq Toxum Federasiyasına üzv qəbul edilib. Üzvlük barədə qərar Federasiyanın keçirdiyi Ümumdünya Toxum Konqresində (3-5 iyun, 2019-cu il) verilib.

Beynəlxalq Toxum Federasiyasının baş katibi Maykl Keller ilə Dövlət Toxum Fondunun sədri Emin Əliyev arasında əldə edilən razılığa əsasən, Azərbaycan bu mötəbər quruma tamhüquqlu üzv olub.

Üzvlük Dövlət Toxum Fonduna qurumun verdiyi bütün hüquq və səlahiyyətlərdən istifadə etmək imkanı verir. Beynəlxalq aləmdə toxumçuluq sahəsində trendləri və qaydaları diqtə edən bu qurum UPOV ( Yeni Bitki Növlərinin Qorunması Birliyi), OECD Seed Scemes (İqtisadi Tərəfdaşlıq və Əməkdaşlıq Təşkilatı Toxum Layihələri), ISTA ( Beynəlxalq Toxum Sertifikatlaşdırılması Assosiasiyası), IPPC (Beynəlxalq Bitki Mühafizəsi Konvensiyası), WIPO (Ümumdünya Müəllif Hüquqları Təşkilatı), FAO (Ərzaq və Kənd Təsərrüfatı Təşkilatı) və bir sıra başqa təşkilatlarda nüfuzlu söz sahibidir.

65 ölkədən 1700-dən artıq nümayəndənin qatıldığı Ümumdünya Toxum Konqresi çərçivəsində Azərbaycan nümayəndələri 40-dan artıq şirkətlə görüş keçiriblər.

“Beynəlxalq Toxum Federasiyasına üzvlüyümüz bizə Azərbaycanda istehsal olunan yüksək keyfiyyətli toxumları xaricə satmağa imkan verəcək. Keçirdiyimiz görüşlərdə biz dünyanın məşhur şirkətlərinin Azərbaycan bazarına gəlmək istəyini müşahidə etməklə yanaşı, bizim məhsulların da xarici bazarlarda böyük uğur qazanacaqlarına əmin olduq”, - Dövlət Toxum Fondunun sədri Emin Əliyev belə deyib. Emin Əliyev əlavə edib ki, təşkilata üzvlük sayəsində qazanılmış geniş əlaqələr azərbaycanlı alimlərin seleksiya nailiyyətlərini paylaşmaq və onları beynəlxalq səviyyədə tanıtmaq imkanı da verir.

Qeyd edək ki, Beynəlxalq Toxum Federasiyası 1924-cü ildə yaradılıb. İlk Konqres də həmin ildə baş tutub. Bu il Azərbaycan Ümumdünya Toxum Konqresində ilk dəfə iştirak edib.

Kənd Təsərrüfatı Nazirliyi tabeliyində Dövlət Toxum Fondu ölkədə kənd təsərrüfatı məhsulları istehsalçılarını yüksək məhsuldar bitki sortlarının toxumları ilə təchiz etmək, habelə təbii fəlakətə (sel, yanğın, quraqlıq və s.) məruz qalmış bölgələrdə toxuma olan ehtiyacı aradan qaldırmaq, daxili bazarda toxum çatışmazlığının və toxumun qiymət artımının qarşısını almaq məqsədilə Azərbaycan Respublikası Prezidentinin 2015-ci il 2 mart tarixli Sərəncamına əsasən yaradılıb.