Rusiyanın energetika naziri Aleksandr Novak, Neft İxrac Edən Ölkələr Təşkilatı (OPEC) ilə təşkilata üzv olmayan ölkələrin hasilatlaını azaltmalarına baxmayaraq, qlobal neft bazarında çətinliklərin davam etdiyini bildirib.

 
"Marja" xəbər verir ki, Novak, "IHS CERAWeek 2017" Enerji Konfransında etdiyi çıxışında, OPEC-in və OPEC-ə daxil olmayan 11 ölkənin bu ilin əvvəlindən etibarən istehsalı gündəlik orta hesabla 1,2 milyon barel azaltmaq qərarının qiymətlər üzərində müsbət təsirinin olduğunu deyib.

 
Sözügedən qərarın ardından neft qiymətlərinin 50-60 dollara qalxdığını qeyd edən Novak, "hazırkı qiymətlər bazarda volatilliyi azaldıb, qlobal bazara sabitlik qazandırıb. İnvestisiya da neft sektoruna qayıtmağa başlayıb",- deyib.

 
 Novak, aşağı neft qiymətləri səbəbilə neft bazarında təxminən 500 milyard dollarlıq investisiyanın yox olduğuna diqqəti çəkib.

 
 OPEC ilə əməkdaşlıq edərək bazarda tarazlığın yaranmasını təmin etməyi düşündüklərini dilə gətirən Novak, "neft bazarı o qədər qlobaldır ki, müxtəlif ölkələrlə həmrəylik içində olmağınız lazımdır, ancaq Neft bazarında çətinliklər davam edir. Bu vəziyyəti yaxından təqib etməyə davam edirik" - deyə bildirib.

 
 "İstehsalın maya dəyərini 10-15 dollara salmışıq"

 
2014-cü ilin İyun ayında 115 dollardan 30 dollara qədər düşən neft qiymətlərinə baxmayaraq Rusiyanın neft hasilatını artırmağa davam etdiyi haqda da danışan Novak, ölkəsinin neft istehsalı xərcini barel başına 10-15 dollara qədər saldığını bildirib.

 
Nazir Novak, Rusiya enerji şirkətlərinin maliyyə baxımından güclü vəziyyətdə olduğuna işarə edərək, Rusiyadakı "çevik vergi sistemi" sayəsində enerji şirkətlərinin qlobal bazarda rəqabətə davamlı qaldığını dilə gətirib.

 
Aşağı neft qiymətlərinə baxmayaraq, Rusiyanın enerji sektoruna xarici sərmayəçinin gəlməyə davam etdiyini bildirən Novak, Asiya-Sakit Okean ölkələri və Hindistandan investorlar cəlb etdiklərini bildirib.

 
 Novak, Rusiyanın, Qütb bölgəsində, Sibirin şərqində və Yamal bölgəsinin şimalında neft və qaz axtarışı-istehsalı fəaliyyətlərinə davam edəcəyini bildirərək, "Qaz gələcəyin enerjisi olmağa davam edəcək, çünki həm ucuz, həm də ətraf mühitə çox ziyan vurmur. Bundan başqa, gələcəkdə mayeləşdirilmiş təbii qazın (LNG) qlobal enerji tələbatında payının artmasını ehtimal edirik"- ifadələrini istifadə edib.