“Azercell Telekom” MMC-i bir sıra kütləvi informasiya vasitələrində SMS tariflərini 2 dəfə bahalaşdırdığı barədə yayılmış xəbərlərə münasibət bildirib.

Şirkətdən "Marja"ya daxil olmuş açıqlamada deyilir:

- Ölkədə mobil rabitə bazarının lideri olan “Azercell Telekom” MMC-i hər zaman abunəçilərin rahatlığını düşünərək innovativ həllərin, müasir texnologiyaların köməyi ilə istifadəçilərə yüksək keyfiyyətli xidmətlər göstərməyi hədəfləyir. 

Qeyd edim ki, öz biznesini şəffaflıq və dürüstlük üzərində qurmağı zəruri hesab edən “Azercell Telekom” MMC fəaliyyətinə dair hər bir dəyişiklik haqda ictimaiyyəti və abunəçilərini müvafiq qanunvericiliyin tələblərinə uyğun şəkildə Kütləvi İnformasiya Vasitələrinin (KİV) köməyi ilə məlumatlandırır. Lakin saytınızda qeyd edilən tarixdə dərc olunan yazıda şirkətin fəaliyyətinə aid məlumatların təhrif olunmuş şəkildə oxuculara çatdırılması “Azercell Telekom” şirkətinin nüfuzuna xələl gətirmək, insanlarda şirkət haqda mənfi rəy formalaşdırmaq cəhdi təəssüratını yaradır. Məsələyə aydınlıq gətirmək üçün aşağıdakı məqamlara toxunmaq istərdik:

HƏMÇİNİN BAX: SMS tarifləri 2 dəfə qalxır

“Azercell Telecom” MMC sabahdan fakturalı və fakturasız (Sim Sim) abunəçilər üçün SMS tariflərini orta hesabla 2 dəfə artırır.” – olaraq çatdırılan məlumatı nəzərdən keçirək. Belə ki, qeyd edilən dəyişiklik 12.02.2019-cu il tarixindən etibarən qüvvəyə minəcək və qanunvericiliyə əsasən dəyişiklik barədə məlumat abunəçilərimiz üçün müvafiq olaraq 30 təqvim günündən əvvəl yayımlanıb.

“Xatırladaq ki, “Azercell Telecom” bu ilin əvvəlindən  roaminqdə istifadə edilən interneti də 80% bahalaşdırıb.” – şəklində qeyd edilən məlumat da təhrif olunub. 10.01.2019-cu il tarixindən etibarən yalnız Gürcüstan və Türkiyə ölkələrində Fakturasız xətt nömrələri üçün rominqdə internet istifadəsinin tarifi bir MB görə ƏDV daxil 0.55 AZN-dən ƏDV daxil 0.99 AZN-ə obyektiv səbəblərə görə dəyişdirilib. Lakin, həmin yeni tariflər Gürcüstan və Türkiyə ölkələrində analoji xidmətlər ilə bağlı bazarda tətbiq edilən tariflərdən xeyli azdır.

Təəssüflər olsun ki, tərəfinizdən jurnalist araşdırması aparılmadan, qərəzli  olaraq yayımlanan bu məlumata sonradan yalnız Türkiyə və Gürcüstan ölkələrinin adları əlavə edilmişdir. Beləliklə, bu düzgün olmayan tərzdə yayımlanan məqalənin digər KİV-lər tərəfindən dərc olunmasına əsas yaratmışdı.

Yuxarıda qeyd edilənləri nəzərə alaraq, müvafiq saytda dərc edilən qərəzli məqalə ilə bağlı bu təkzibin dərc edilməsini, həmçinin gələcəkdə “Azercell Telekom” MMC-nin fəaliyyətinə aid məlumatların dərcindən əvvəl KİV haqqında qanunvericiliyin tələblərinə uyğun olaraq aparılan araşdırma çərçivəsində şirkətin mövqeyinin nəzərə alınmasını xahiş edirik.