Bu gün "Azərsun Holdinq" MMC-nin Müşahidə Şurasının sədri Abdolbari Gözələ "Şöhrət" ordeni təqdim edilib.

İş adamına ordeni Azərbaycan prezidentinin ictimai-siyasi məsələlər üzrə köməkçisi Əli Həsənov təqdim edib.

Qeyd edək ki, 2016-cı ilin dekabr ayının 28-də prezident İlham Əliyev Dünya Azərbaycanlılarının Həmrəylik Günü münasibətilə bir qrup şəxsin təltif edilməsi haqqında sərəncam imzalayıb. Sərəncama əsasən, A. Gözəl "Şöhrət" ordeni ilə təltif edilib.

Təqdimat mərasimində çıxış edən Ə. Həsənov qeyd edib ki, “Azərsun Holdinq” artıq milli şirkət deyil, xarici bazarlarda ciddi, rəqabətədavamlı oyunçu kimi qəbul olunur: “Təkcə onu qeyd etmək kifayət edir ki, holdinqin yaratdığı infrastruktur, istehsalat sahələri, logistika beynəlxalq standartlara cavab verir. Şirkətlər qrupunda on minlərlə vətəndaşımız çalışır ki, onlar yüksək əmək haqları ilə təmin olunublar. Holdinqin istehsal etdiyi məhsullar nəinki daxili tələbatı ödəyir, eyni zamanda milli brend kimi xarici bazarlarda tanınır ki, bunun nəticəsində ölkəyə xarici valyuta daxil olur. “Azərsun Holdinq” ölkəmizə yeni istehsalat mədəniyyəti gətirib. Holdinqin uğurlarının təməlində dayanan əsas amil odur ki, Abdolbari Gözəl bura zəhmətkeş insanları toplaya bilib. “Azərsun Holdinq” ölkənin qida təhlükəsizliyinin təmin olunmasında müstəsna yer tutur. Bu cür şirkətlər isə dövlətin diqqət və qayğısından bəhrələnir”.

Çıxışına yekun vuran prezidentin köməkçisi A. Gözəli çalışqan bir insan kimi xarakterizə edib. “Belə bir deyim var: hər gün öləcəyin kimi yaşa, lakin heç zaman ölmədiyin kimi çalış. Abdolbari Gözəl bu cür insanlardandır”, - deyə Ə. Həsənov qeyd edib.

A. Gözəl isə çıxışına xatirələri ilə başlayıb: “Mən Azərbaycana Turqut Özalın təklifi ilə gəlmişəm. O vaxt İrandan Türkiyəyə gedərkən Özala İsveçrəyə gedəcəyimi dedim. Çünki İran hakimiyyətinə dəstək verdik, amma bunun qarşılığını almadıq. Özal isə məni israrla Azərbaycana göndərdi. O zaman ilk dəstəyi Heydər Əliyevdən aldıq. Həmin dövrdə bizə tez-tez nazirlər “qonaq gəlirdi”. Bu barədə Heydər Əliyevə dedim. Prezident çox əsəbləşdi və onlara ciddi xəbərdarlıq etdi. Ardınca ölkə başçısı mənə dedi ki, “bundan sonra qonaq gələn olmayacaq". Biz o zaman qida sektoruna daxil olduq. İstehsal etdiyimiz çay artıq bir dünya brendinə çevrilib. Biz iş görərkən heç vaxt pulu, qazancı düşünməmişik. Bizdə bir məşhur misal var: böyük tikə boğazda qalar. Başqa sözlə, az ye, həmişə ye. Həmin dövrdə Azərbaycanda insanların maddi durumu çox pid idi. Qolundakı saatı sataraq evinə çörək alan adamları tanıyırdım. Çox şükür, o çətinliklərin öhdəsindən gəldik. Bu gün isə mənə prezident İlham Əliyevin verdiyi “Şörhət” ordeni təqdim edilir. Ölkə başçısının bu mükafatı onu göstərir ki, biz həqiqətən də çalışmışıq və çalışırıq. Bu mükafat mənə bir daha onu göstərdi ki, çəkilən zəhmət qiymətsiz qalmır”.