26 noyabr tarixində Boulevard Hotel-də “PMD Projects” MMC-nin təşkilatçılığı ilə 100-dən çox yerli şirkətin iştirak etdiyi “Satınalmalar Seminarı” keçirilmişdir.

“PMD Projects” MMC daxili bazarda fəaliyyət göstərən səriştəli şirkətlərlə əməkdaşlığını gücləndirmək, həyata keçirdiyi tikinti, təmir-bərpa işləri üzrə layihələrə yeni şirkətləri cəlb etmək və ümumiyyətlə, “PMD Projects” MMC haqqında, onunla əməkdaşlığın yolları, mövcud satınalma qaydaları barədə ətraflı məlumat vermək məqsədilə artıq ikinci dəfədir ki, bu seminarı təşkil edir.

Tədbiri giriş sözü ilə “PMD Projects” MMC-nin direktoru Dəyanət Sədullayev açaraq şirkətin fəaliyyəti, həyata keçirilən işlər, sözügedən seminarın məqsədi barədə məlumat verdi. Bildirildi ki, mövcud və gələcək layihələrin icrası prosesində uyğun səriştəsi olan istənilən yerli şirkət “PMD Projects” MMC tərəfindən tam şəffaf şəraitdə təşkil olunan satınalmalarda iştirak etməyə dəvətlidir.

Daha sonra “PMD Projects” MMC-nin Təchizat üzrə direktor Tural Vəzirov geniş təqdimatla çıxış edərək şirkət tərəfindən ötən dövrdə icra olunmuş, hal-hazırda icrası davam edən və yaxın gələcəkdə icrası nəzərdə tutulan layihələr, eləcə də şirkətin satınalma qaydaları, tender prosesləri haqqında geniş məlumat verdi. Təqdimat bitdikdən sonra tədbir iştirakçılarının sualları cavablandırıldı.

Tədbirin sonunda isə “PAŞA Bank”-ın nümayəndələri tərəfindən korporativ müştərilər üçün nəzərdə tutulan korporativ kreditləşmə, faktorinq xidmətləri və bank zəmanətləri kimi bank məhsullarına dair ətraflı məlumatlar tədbir iştirakçılarına təqdim olundu.

Ümumiyyətlə qeyd edək ki, hal-hazırda icra olunan və gələcəkdə icrası nəzərdə tutulan layihələrdə mülki tikinti (dəmir-beton), mexanik və elektrik sistemlərinin təchizi və quraşdırılması, daxili bəzək işlərinin yerinə yetirilməsi ilə əlaqədar yerli bazarın ixtisaslı şirkətləri “PMD Projects” MMC-nin satınalmalar departamentinin e-mail ünvanına (procurement@pmdprojects.az) özləri haqqında qısa məlumat göndərməklə, həmçinin, 012 505 04 00 telefon nömrəsi ilə əlaqə saxlamaqla təchizatçılar siyahısına qatılıb, növbəti layihələrdə iştirak niyyətlərini bildirə bilərlər. Həmçinin, şirkətə dair daha ətraflı məlumatı www.pmdprojects.az internet səhifəsindən əldə etmək mümkündür.