Azərbaycan və RF əməkdaşlığının prioritet sahələrinə Rusiyanın neft-qaz sənayesi məhsullarının ixracı kimi əsas sfera aiddir.

Bunu  Rusiya İxrac Mərkəzinin Azərbaycandakı nümayəndəliyinin rəhbəri Nuri Quliyev deyib.

Onun sözlərinə görə, əməkdaşlığın prioritet sahələri arasında maşınqayırma, avtomobil, vaqon istehsalı, əczaçılıq, metal emalı sənayesi, aqrar, meşə sənayesi və Azərbaycan bazarında məhsullarına tələbat olan digər sahələri göstərmək olar.

N.Quliyev bildirib ki, rusiyalı ixracatçılar Azərbaycan bazarına tarixən potensial maraq göstəriblər.

Nümayəndəliyin rəhbəri vurğulayıb ki, bu, bir sıra meyarlarla şərtləndirilib: "Bu meyarlardan ən əsası RF ilə Azərbaycan arasında rüsumsuz ticarətin nəzərdə tutulduğu azad ticarət haqqında 1992-ci il 30 sentyabr tarixli sazişdə qeyd olunmuş azad ticarət prinsipidir. Əlbəttə ki, bu, qiymət formalaşması baxımından Rusiya məhsulunun cəlbediciliyinə təsir göstərir. Bu amil Rusiyanın müxtəlif sahələrə aid məhsullarının Azərbaycan bazarında maksimum rəqabətqabiliyyətli qalmasına və tələbata cavab verməsinə imkan yaradır".

O qeyd edib ki, ölkələr arasında ticari-iqtisadi münasibətlərin genişləndirilməsində əlavə güclü vasitə Rusiya-Azərbaycan və Azərbaycan-Rusiya İşgüzar şuralarıdır:

"İşgüzr şuralar öz tərkibində Azərbaycan və RF bazarlarına çıxmağa potensial marağı olan Rusiya və Azərbaycan şirkətlərini birləşdirir".

Agentliyin müsahibi deyib ki, Azərbaycan tərəfi Rusiyanın aqrar sənayesi və turizm sektoruna investisiyaların artmasına maraq göstərir:

"O cümlədən Yessentukidə "İstoçnik" sanatoriyasının tikintisi üzrə layihənin reallaşdırılması kimi uğurlu nümunəni də qeyd etmək olar. Dəyəri 1,5 milyard rubl olan layihəni Azərbaycan şirkətləri maliyyələşdiriblər".

Qeyd edək ki, Azərbaycan Rusiya iqtisadiyyatına 1 milyard dollardan çox, Rusiya isə Azərbaycan iqtisadiyyatına 4 milyard dollardan artıq investisiya qoyub. Azərbaycanda Rusiya kapitallı 760 şirkət fəaliyyət göstərir.

Dövlət Gömrük Akademiyasının məlumatına əsasən, Rusiya ilə Azərbaycan arasında əmtəə dövriyyəsi 2018-ci ilin yanvar-oktyabr aylarında təqribən 2 milyard dollar təşkil edib. Azərbaycan məhsullarının ixracının payına 509,98 milyon dollar düşür. Ötən ilin analoji dövrünün göstəricisi ilə müqayisədə iki ölkə arasında əmtəə dövriyyəsi 20 faiz artıb.

© Trend