"Qazprom" PSC-nin İdarə Heyəti sədrinin müavini Aleksandr Medvedev Avropa bazarında bütün qaz təchizatçıları, o cümlədən də Azərbaycan üçün yer olduğunu qeyd edir.

"Avropa bazarındakı Rusiya və digər təchizatçıların qazı ilə bağlı rəqabətə gəlincə, onu deyə bilərəm ki, Avropada hasilat zəifləyir, idxala tələbat isə durmadan artır. Bazarda bütün təchizatçılara yer çatacaq. İstehlakçılara kommersiya cəhətdən ən cəlbedici tədarük şərtləri təklif edənlər isə rəqabətin ən güclüləri olacaq", - deyə o, “Qazprom” korporativ jurnalına müsahibəsində qeyd edib.

Sədr müavini vurğulayıb ki, hazırda "Qazprom" Avropa qaz bazarında uğurla rəqabət aparır, şirkət tərəfindən həyata keçirilən rekord həcmdə təchizat bunu təsdiq edir.

A.Medvedev, həmçinin bildirib ki, "Qazprom" ilə Azərbaycan arasında çox gözəl iş münasibətləri yaranıb.

"Azərbaycana qaz tədarükü qüvvədə olan müqavilə çərçivəsində həyata keçirilir. Gələcək əməkdaşlığın perspektivlərinə gəlincə, biz dialoqa hər zaman açıqıq", - deyə o əlavə edib.

Prezident İlham Əliyev 2018-ci il mayın 29-da Azərbaycan qazının Avropaya nəqli üçün infrastrukturun yaradılmasını nəzərdə tutan Cənub Qaz Dəhlizini işə salıb.

Layihənin dəyəri 40 mlrd. dollardan çoxdur.

Layihənin əsas komponentləri bunlardır: “Şahdəniz” layihəsi üzrə “Mərhələ-2”, Bakı-Gürcüstan-Türkiyə sərhədi Cənubi Qafqaz boru kəməri magistralının genişləndirilməsi, Türkiyənin şərq sərhədindən qərb sərhədinə qədər Trans-Anadolu qaz kəmərinin (TANAP) və Yunanıstan, Albaniya və Adriatik dənizini birləşdirən Trans-Adriatik qaz kəmərinin (TAP) tikintisi.

10 mlrd. kubmetr həcmində Azərbaycan qazının Avropaya 2020-ci ildə nəql olunacağı gözlənilir. Bundan başqa, 6 mlrd. kubmetr həcmində Azərbaycan qazı Türkiyənin qərb regionlarına nəql olunacaq.

21 noyabr 2017-ci il tarixində “Qazprom eksport” ASC və SOCAR arasında Azərbaycana qaz tədarükü haqqında müqavilə imzalanıb. Tədarükə noyabrın 22-dən başlanılıb. 1 illik müqavilə çərçivəsində Azərbaycana 1,6 mlrd. kubmetr Rusiya qazının tədarükü planlaşdırırlır.

Ötən il Rusiyadan Azərbaycana 349 mln. kubmetr qaz tədarük edilib.

Energetika Nazirliyinin məlumatına görə, 2018-ci ildə Azərbaycan Rusiyadan 800 mln. kubmetr təbii qaz idxal edib.

SEMİNARA QATIL, ÖZÜNƏ YATIRIM ET

© İnterfaks-Azərtbaycan