"AccessBank"ın Azərbaycan Dövlət İqtisad Universitetində (UNEC) reallaşdırdığı uğurlu layihələrdən biri ənənəyə çevrildi.

Bankın təşkil etdiyi "UNEC Business Conversation Club" tələbələr tərəfindən böyük maraqla qarşılandığından tərəflər bu layihəni ənənəyə çevirmək barədə razılıq əldə edib. Beləliklə, oktyabr ayının 17-də növbəti "UNEC Business Conversation Club" layihəsinin açılışı baş tutub.

Tədbiri giriş sözü ilə açan UNEC-in "Maliyyə və mühasibat" fakültəsinin dekanı Gəray Musayev təmsil etdiyi ali təhsil ocağı ilə "AccessBank" arasında əməkdaşlıq səviyyəsindən olduqca məmnun olduğunu bildirib: "Hər kəs ilk layihənin necə faydalı olduğunun şahidi oldu. Şübhəm yoxdur ki, bu gün start verdiyimiz layihə də çox faydalı olacaq".

Prorektor Səadət Qəndilova isə bildirdi ki, "AccessBank"ın UNEC-də həyata keçirdiyi layihələr bankın imicinin möhkəmlənməsinə səbəb olub: "Mən şəxsən tələbələrimizin dilindən "UNEC Business Conversation Club" layihəsi barədə ağızdolusu danışmasının şahidi olmuşam və bu məni olduqca məmnun edib.

"AccessBank"ın İdarə Heyəti sədrinin müavini/Baş maliyyə inzibatçısı Albrext Sabelus isə "UNEC Business Conversation Club"ı çox effektiv bir layihə adlandırıb: "Mən özüm də bu layihənin iştirakçısı olmuşam və əminlinklə deyə bilərəm ki, "UNEC Business Conversation Club" həm tələbələrə, həm də "AccessBank"a olduqca böyük fayda verib".

"AccessBank"ın Korporativ Bankçılıq/Marketinq departamentinin direktoru Günay Cəlilova isə qeyd edib ki, budəfəki layihə 10 sessiyadan ibarət olacaq: "Sözsüz ki, ilk layihəmiz olduqca uğurlu alındı. Bununla yanaşı, bizə xeyli təcrübə toplamağa imkan verdi və bu təcrübə bizə şərait yaradır ki, yeni layihəni daha da maraqlı və effektiv edək".

UNEC-in "Xarici dillər" kafedrasının dosenti, "UNEC Business Conversation Club" layihəsinin müəllifi Xavər Hacıyeva: "Biz bu layihə başlayanda heç bilməzdik ki, "UNEC Business Conversation Club" bu qədər uğurlu olacaq. Müəllimin işi öyrətmək, tələbənin işi isə öyrənməkdir. Məni çox sevindirir ki, hər kəs öz işinin öhdəsindən artıqlaması ilə gəldi!"

Qeyd edək ki, "AccessBank"ın dəstək verdiyi və 8 həftə davam edən "UNEC Business Conversation Club" layihəsi çərçivəsində tələbələr ingilis dilinin biznes istiqamətini öyrənib. İELTS mütəxəssisləri ilə yanaşı, bankın əməkdaşları da layihədə iştirak edərək ingilis dilində öz təcrübələri ilə bölüşüb.

Əlavə edək ki, layihədə iştirak edən tələbələr "UNEC Business Conversation Club" davam etdiyi müddət ərzində bankda ekskursiyada olub, hər bir struktur bölmənin iş prosesi ilə yaxından tanış olub. Həmçinin, layihə bitdikdən sonra tələbələr "AccessBank"da 3 həftəlik təcrübə proqramı keçib və müvafiq sertifikatla təltif olunub.