Müstəqil məsləhət şirkəti Brend Finance-in nəşr etdiyi "Global 500-2017" adlı hesabatda, Google-ın marka dəyərinin keçən ilə nisbətən 24% artım göstərərək 109,5 milyard dollara yüksəldiyi bildirilib. Keçən ilki hesabatda Google-ın marka dəyəri 88,2 milyard dollar olmuşdu.

“Marja” xəbər verir ki, beləliklə Google, Apple-ı keçərək, dünyanın ən qiymətli markası olub.

Hesabatda, dünyanın ən böyük markalarının müştərilərinə çatmasını təmin edən Google-ın axtarış sisteminin uğuruna diqqət çəkilib, şirkətin bu xidmətdən əldə etdiyi reklam gəlirlərinin də keçən il 20 faiz artdığı vurğulanıb.

Digər tərəfdən, hesabatda, Apple-ın marka dəyərinin keçən ilə nisbətən 27 faiz azalaraq 107,1 milyard dollara düşdüyü qeyd olunub. Şirkətin keçən il marka dəyəri 145,9 milyard dollar olmuşdu.

Beləliklə 2011-ci ildən bu yana 6 il ardıcıl dünyanın ən qiymətli markaları siyahısının zirvəsində yer alan Apple, bu il ikinci sıraya geriləyib.

"MÜŞTƏRİLƏR ŞİRKƏTƏ İNAMINI  İTİRMƏYƏ BAŞLAYIB”

Hesabatda, Apple-ın sadiq müştərilərinin şirkətə olan inamını itirməyə başladığı qeyd edilərək "Apple, müştərilərinin yaxşı niyyətini ifrat dərəcədə istismar edib. Apple Watch kimi yeni məhsullar əhəmiyyətli gəlir formalaşdırmaqda uğursuz olub və şirkət istehlakçılarının arzuladığı innovativ texnologiyaları ortaya qoya bilmədi" - ifadəsinə yer verilib.

 Apple markasının "işığını itirdiyi" şərhinə yer verilən hesabatda, şirkətin gəlirlərinin böyük hissəsini təşkil edən iPhone-un Cənubi Koreyanın elektronika nəhəngi Samsung ilə bərabər, Çinin mobil telefon istehsalçıları Huawei və Oneplus ilə də rəqabət etmək məcburiyyətində olduğu vurğulanıb.

 Dünyanın ən qiymətli markaları siyahısında ABŞ-ın e-ticarət nəhəngi Amazon bu il üçüncü sıradakı yerini qoruyub. Amazon-un marka dəyərinin keçən ilə nisbətən 53 faiz artaraq bu il 106,4 milyard dollara çatdığı bildirilib.

 Amazon-un gələcək 18 ay ərzində ABŞ-da 100 min nəfərlik yeni iş yeri yaratmağı vəd etdiyinə diqqət çəkilən hesabatda, şirkətin gələn il dünyanın ən qiymətli markaları siyahısında zirvədə yer ala biləcəyinə  də yer verilib.

 Siyahıda dördüncü sırada ABŞ telekommunikasiya nəhəngi AT&T, beşinci sırada Microsoft və altıncı sırada Samsung yer alarkən, digər bir Amerikalı telekommunikasiya şirkəti Verizon yeddinci, pərakəndə şəbəkə Walmart səkkizinci, Facebook doqquzuncu və Çinli bankçılıq nəhəngi ICBC onuncu olub.

 Brand Finance, dünyanın ən qiymətli markaları siyahısını tərtib edərkən, istehlakçıların şirkətə olan duyğusal bağlılığını, şirkətlərin maliyyə performansını, mövcud və potensial gəlir məbləğlərini, lisenziya müqavilələri və s. kimi amilləri  nəzərə alır.

Global 500 siyahısı ilə buradan tanış ola bilərsiniz.