ABŞ-ın Energetika Nazirliyi ölkənin strateji xam neft ehtiyatlarının bir qisminin sözügedən sistemin infrastrukturunun modernləşdirilməsi xərclərində istifadə edilməsi üçün satışına başlandığını açıqlayıb.
 

"Marja" xəbər verir ki, ABŞ-ın Energetika Nazirliyindən edilən açıqlamada, cəmi 695,1 milyon barrel olan strateji xam neft ehtiyatlarının 8 milyon barrelinin satışı üçün ilk tenderin elan edildiyi, "Shell Trading"  və "Phillips 66" adlı şirkətlərin ümumilikdə 6,4 milyon barel alış hüququ qazandıqları qeyd olunub.

 
Açıqlamada, ehtiyatların satışından əldə ediləcək gəlirin strateji neft ehtiyatlarının saxlanılması üçün infrastrukturun modernləşdirilməsi üçün istifadə edilməsinin planlaşdırıldığı qeyd olunub.
 

ABŞ-ın Qərbi Texas növü xam neftinin barrelinin qiyməti 53 dollardan hesablandıqda, sözügedən ehtiyatlardan satılacaq 6,4 milyon barrelin təqribən 340 milyon dollar gəlir gətirməsi gözlənilir.

 
ABŞ Konqresi tərəfindən 2015-ci ilin Oktyabr ayında qəbul edilən büdcə qanunu, strateji ehtiyatların modernləşmə üçün ehtiyatlardan 2 milyard dollar dəyərində satış etməsinə icazə verir.

 
2015-ci  ilin Dekabr ayında qəbul edilən bir başqa qanunda isə 2023-2025 illəri arasında ehtiyatlardan 66 milyon barrel neftin satılaraq, ABŞ-ın avtomobil yolları infrastrukturuna xərclənməsi nəzərdə tutulur.

 
Bundan başqa, ötən ay qəbul edilən bir qanun da 2017-2019-cu illəri arasında strateji ehtiyatlardan 25 milyon barrel xam neftin satışına imkan verir.

 
ABŞ-ın strateji neft ehtiyatları, müharibə, təbii fəlakət, hasilat fasiləsi kimi səbəblər ucbatından ölkədə xam neft çatışmazlığının baş verməməsi üçün mühüm əhəmiyyət kəsb edir.

Bundan başqa, ABŞ kimi bütün Beynəlxalq Enerji Agentliyinin (IEA) üzvü olan ölkələr ən az 90 günlük xam neft idxalına bərabər neft miqdarını saxlaması lazımdır.

 
 ABŞ-ın Enerji İnformasiya İdarəsinin (EIA) məlumatlarına görə, ölkənin strateji xam neft ehtiyatları 145 günlük xam neft idxalına bərabər səviyyədədir. Keçən həftə 488,3 milyon barrel olan kommersiya məqsədli xam neft ehtiyatları da 102 günlük neft idxalını ödəyəcək səviyyədədir.