Bu gün Kənd Təsərrüfatı Nazirliyində Kənd Təsərrüfatı Nazirliyinin Aqrar Elm və İnformasiya Məsləhət Mərkəzi ilə “ABAD” (Ailə Biznesinə Asan Dəstək) publik hüquqi şəxs arasında “Kənd təsərrüfatı sahəsində informasiya məsləhət xidmətlərinin göstərilməsi sahəsində əməkdaşlıq haqqında Anlaşma Memorandum”u imzalanıb.

Memorandumun məqsədi kənd təsərrüfatı və aqrobiznes sahəsində informasiya məsləhət xidmətlərinin və təcrübə mübadiləsinin təşviqi ilə bağlı AEİMM və ABAD arasında tərəfdaşlıq əlaqələrinin yaradılması istiqamətində birgə tədbirlərin həyata keçirilməsidir.

Görüşdə nazir müavini SeyfəddinTalıbov qonaqları səmimi salamlayaraq “Azərbaycan Respublikasında kənd təsərrüfatı məhsullarının istehsalı və emalına dair Strateji yol Xəritəsi”ndə qarşıya qoyulan əsas hədəflərdən birinin də informasiya məsləhət xidməti şəbəkəsinin yaxşılaşdırılması olduğunu qeyd edib və birgə əməkdaşlığın bu sahənin inkişafına təkan verəcəyini nəzərə çatdırıb.

Nazir müavini SeyfəddinTalıbov “ABAD” publik hüquqi şəxs tərəfindən bölgələrdə həyata keçirilən layihələrin nəticələri ilə tanış olduğunu, bu əməkdaşlığa böyük önəm verdiyini, bu sahədə hüquqi bazanın yaradıldığını və görülən işlərə nazirlik tərəfindən hərtərəfli dəstək veriləcəyini diqqətə çatdırıb.

Nazir müavini Kənd Təsərrüfatı Nazirliyinin bölgələrdə çoxşaxəli qurumlarının olmasını qeyd edərək Elmi-təqqiqat İnstitutlarının yerlərdəki təcrübə-sınaq stansiyalarından, alimlərin potensial imkanlarından, torpaq analizlərinin aparılması üçün ən müasir cihaz və avadanlıqlarla təchiz olunmuş 11 regional aqrokimya laboratoriyasının, arıçılıq mərkəzinin, həmçinin Süni Mayalama Mərkəzinin imkanlarından istifadə olunması üçün əlverişli şəraitin olduğunu bildirib.

Seyfəddin Talıbov Kənd Təsərrüfatı Nazirliyi və Dünya Bankının birgə icra etdikləri “Kənd Təsərrüfatının  Rəqabət Qabiliyyətinin Gücləndirilməsi” Layihəsinin Aqrobiznesə maliyyə yardımı subkomponenti çərçivəsində dəyər zəncirlərinin inkişaf etdirilməsi ilə həyata keçirilən mikrolayihələrlə “ABAD” publik hüquqi şəxsi tərəfindən həyata keçirilən layihələrin əlaqələndiriıməsini məqəsədəuyğun hesab edib.

“ABAD” publik hüquqi şəxsin direktoru Rüfət Elçiyev səmimi qəbula görə minnətdarlığını bildirərək təşkilatın əsas fəaliyyət istiqamətləri, xüsusilə kiçik və orta sahibkarlığın inkişafı ilə bağlı həyata keçirilən layihələr barədə məlumat verib, bu işlərdə kənd təsərrüfatı nazirliyinin daim dəstək göstərdiyini, müvafiq qurumlar və şöbələrlə sıx əlaqələrin qurulduğunu qeyd edib, Azərbaycan Dövlət Aqrar Universitetində həyata keçirilən quruculuq işləri, yeni qurulmuş laboratoriya və tələbə yataqxanaları ilə tanış olduqlarını nəzərə çatdırıb və bu əməkdaşlıqdan məmnun olduğunu bildirərək birgə fəaliyyətin aqrar sahədə kiçik və orta sahibkarlığın inkişafına dəstək verəcəyini qeyd edib. Rüfət Elçiyev “ABAD” publik hüquqi şəxsin ailə təsərrüfatlarına, kiçik və orta sahibkarlara dəstək layihələrinin həyata keçirilməsi, istehsalatda müasir texnoloji istehsal avadanlıqlarından istifadə, marketinq, brendinq və dizayn, maliyyə-mühasibat, hüquqi yardım xidmətlərinin göstərilməsi, istehsal olunan məhsulun daşınmasının və satışının təşkili kimi xidmətlər göstərdiyini diqqətə çatdırıb.