“AzərTürkBank” böyük məbləğdə aktivlərini və öhdəliklərini azaltsa da, 9 ayı ehtiyatın hesabına mənfəətlə başa vura bilib.

 Dövlət bankı “AzərTürkBank” ASC 2017-ci ilin 9 ayını 127 min 930 manat xalis mənfəətlə başa vurub.

“Marja” Bankın maliyyə hesabatlarına istinadən xəbər verir ki, cari ilin yanvar-sentyabr aylarında Bankın cəmi gəlirləri 19 milyon 226 min manat, o cümlədən faiz gəlirləri 12 milyon 688 min manat, qeyri-faiz gəlirləri isə 6 milyon 538 min manat təşkil edib. Həmçinin Bank ehtiyatlardan 189 min 867 manat azad edib. Ötən ilin anoloji dövrü ilə müqayisədə Bankın faiz və qeyri-faiz gəlirləri azalıb.

Bütün xərclər (19 milyon 292 min manat) çıxıldıqdan sonra Bankın 127 min 930 manat xalis mənfəəti qalıb. “AzərTürkBank” 2016-cı ili 7 milyon 338 min manat xalis mənfəətlə başa vurmuşdu.

30 Sentyabr 2017-ci il tarixində “AzərTürkBank” 295 milyon 206 min manat cəmi aktivlərə, 241 milyon 766 min manat cəmi öhdəliklərə və 53 milyon 439 min manat cəmi balans kapitalına malik olub.

Ötən ilin sonunda Bank 469 milyon 549 min manat cəmi aktivlərə, 414 milyon 903 min manat cəmi öhdəliklərə və 54 milyon 646 min manat cəmi balans kapitalına malik idi. Aktiv və öhdəliklərin kəskin azalması Bankın verdiyi borcları geri yığaraq, öz öhdəliklərini azaltmasıdır. 

Belə ki, ötən ilin sonunda müştərilərə verilən kreditlər 149 milyon 284 min manatdan 115 milyon 489 min manata,  “AzərTürkBank”ın digər banklara verdiyi borc 212 milyon 549 min manatdan 41 milyon 557 min manata geriləyib.

Eyni zamanda, “AzərTürkBank”ın digər Banklar və maliyyə müəssisələri qarşısında öhdəlikləri 144 milyon 336 min manatdan 53 milyon 532 min manata, müştəri hesablarındakı vəsaitlər 265 milyon 960 min manatdan 187 milyon 588 min manata düşüb. Yəni, “AzərTürkBank” böyük məbləğdə verdiyi borcları alıb, aldığı borcları qaytarıb.  

“AzərTürkBank” 52 milyon manat məcmu kapitala malikdir.

"AzərTürkBank"ın səhmdarları Azərbaycan Respublikasının Əmlak Məsələləri Dövlət Komitəsi (75.00%), Türkiyə Respublikası Ziraat Bank (12,37 %), AzRe Təkrarsığorta ASC (6.55%), “Qala Həyat” Sığorta Şirkəti ASC (5.00%) və Ziraat Bank İnternational-dır (1.08%).