“ExpressBank” ASC 2017-ci ilin 9 ayını 828 min manat xalis mənfəətlə başa vurub.

“Marja” Bankın maliyyə hesabatlarına istinadən xəbər verir ki, cari ilin yanvar-sentyabr dövründə “ExpressBank”ın cəmi gəlirləri 29 milyon 522 min manat, o cümlədən faiz gəlirləri 19 milyon 337 min manat, qeyri-faiz gəlirləri (əməliyyat gəlirləri) isə 10 milyon 154 min manat, məzənnə fərqindən gəlir 31 min manat təşkil edib.

Eyni dövrdə Bankın cəmi xərcləri 28 milyon 694 min manat təşkil etmiş və nəticədə Bank 828 min manat xalis mənfəət əldə edib. Bank 2016-cı ili 439 min manat xalis mənfəətlə bağlamışdı.

2016-cı ilin 9 ayı ərzində “ExpressBank”ın cəmi gəlirləri 36 milyon 397 min manat (29 milyon 253 min manat faiz, 7 milyon 144 min manat qeyri-faiz), cəmi xərcləri 39 milyon 482 min manat təşkil etmiş və 3 milyon 441 min manat zərər açıqlamışdı. Bankın faiz gəlirləri azalsa da, qeyri-faiz gəlirlərinin 42% artması diqqəti cəlb edir.

AKTİVLƏRİ ARTIB

30 Sentyabr 2017-ci il tarixində “ExpressBank”ın cəmi aktivlər 295 milyon 369 min manat, cəmi öhdəlikləri 152 milyon 703 min manat, cəmi balans kapitalı 142 milyon 666 min manat təşkil edib.

Ötən ilin sonunda “ExpressBank” 287 milyon 87 min manat cəmi aktivlərə, 148 milyon 551 min manat cəmi öhdəliklərə və 138 milyon 537 min manat cəmi balnsa kapitalına malik idi.

Ötən ilin sonu ilə müqayisədə müştərilərə verilən kreditlər 214 milyon 595 min manatdan 165 milyon 744 min manata düşüb, müştərilərin depozitləri isə 79 milyon 505 min manatdan 129 milyon 326  min manata qalxıb.

Bankın 129 milyon 326 min manatlıq depozit portfelinin 61 milyon 745 min manatını və ya 48%-ni əhalinin əmanətləri təşkil edib. Hesabat dövrünə əhalinin əmanətləri 22,5 milyon manat məbləğində artmışdır.

“ExpressBank”ın müştərilərə verdiyi 165 milyon 744 min manat kreditin 5 milyon 765 min manatının və ya 3,5%-nin ödəmə vaxı keçib. Portfelin problemli hissəsi 3,7%-dən 3,5%-ə enmişdir.

“2016-ci ildən verilən 12 min kreditdən yalnız 7 kredit 90 gündən çox gecikmədədir”,- Bank bildirir.

"ExpressBank" qeyd edir ki, 38 min yeni müştəri hesabı açılmışdır (rüblük artım 23%).  İl ərzində yeni sahibkar və hüquqi şəxs müştərilərin sayı 2 mini ötmüşdür (25% artım).

"ExpressBank", məcmu kapital adekvatlığı göstəricisi üzrə (42.6%) sektorda birinciliyini qorunmaqdadır. Leverec əmsalı (43.4%) üzrə də bank sektorun liderləri sırasındadır.