Azərbaycanda fəaliyyət göstərən iri banklardan biri olan “AccessBank” QSC 2017-ci ilin 9 ayı üzrə maliyyə hesabatlarını açıqlayıb.

“Marja” maliyyə hesabatılarına istinadən xəbər verir ki, 30 Sentyabr 2017-ci il tarixində “AccessBank” QSC-nin cəmi aktivləri 852 milyon manat, cəmi öhdəlikləri 773 milyon 644 min manat, cəmi balans kapitalı isə 78 milyon 357 min manat təşkil edib.

Bank 2016-cı ilin sonunda 1 milyard 58 milyon 871 min manat cəmi aktivlərə, 1 milyard 6 milyon 411 min manat cəmi öhdəliklərə və 52 milyon 460 min manat cəmi balans kapitalına malik idi.

KAPİTALI ARTIB

Diqqəti cəlb edən Bankın cəmi balans kapitalının 52 milyon 460 min manatdan 78 milyon 357 min manata yüskəlməsidir. "AccessBank"ın səhmdarları 34.85 milyon manat və 20 milyon manat məbləğində olmaqla bu il Bankın nizamnamə kapitalını iki dəfə artırıblar. Nəticədə Bankın nizamnamə kapitalı 140 milyon manata çatıb.

“AccessBank”ın aktivlərinin azalmasının əsas səbəbi kredit portfelinin azalması, öhdəliklərinin azalması isə Bankın götürdüyü kreditləri qaytarmasıdır.

Bildiyimiz kimi, devalvasiyalardan sonra banklar bir müddət kredit ayırmağı dayandırmış, həmçinin bazardakı qeyri-müəyyənlik və tələblərin sərtləşdirilməsilə bağlı olaraq kreditlərə tələb azalmıdı. Bu səbəbdən bankların müştərilərə verdiyi kreditlər azalıb. Ötən 9 ayda “AccessBank”ın kredit portfeli 598 milyon 794 min manatdan 497 milyon 672 min manata düşüb. 2018-ci ildən başlayaraq müştərilərə verilən kreditlərin yenidən artacağı gözlənilir.

BORCLARINI QAYTARIR

“AccessBank” xarici maliyyə təşkilatlarından götürdüyü kreditləri də sürətlə qaytarır. Bank bu ilin 9 ayı ərzində borcundan 241 milyon 396 min manat qaytarıb və nəticədə cəmi borc 511 milyon 151 min manatdan 269 milyon 755 min manata düşüb. “AccessBank” digər öhdəliklərini də (subordinasiyalı və sair bu qəbildən olan borc öhdəlikləri, digər passivlər) xeyili azaldıb.

DEPOZİTLƏR ARTIB

Bu günədək “AccessBank”a şirkətlərin və əhalinin inamı yüksək səviyyədədir. Bunu depozitlərin artması da sübut edir. “AccessBank”da ötən ilin sonunda 284 milyon 846 min manat olan depozitlər 376 milyon 792 min manata qalxıb (32,3% artıb).

2017-ci ilin yanvar-sentyabr dövründə “AccessBank”ın faiz gəlirləri 78 milyon 143 min manat təşkil edib. Bank gəlirindən, aktivlər üzrə mümkün zərərlərin ödənilməsi üçün xüsusi ehtiyatın yaradılmasına  21 milyon 343 min manat ayırıb.

“AccessBank” son bir ildə elektron xidmətlərin təkmilləşdirməsinə böyük sərmayə yatırıb. Bank hazırda “myAccess” adlı internet və mobil bankinq xidmətini təqdim edir. Müştərilər banka gəlmədən “myAccess” vasitəsilə bir çox bank əməliyyatlarını apara bilirlər.

Manatın sabitləşməsi ilə bərabər 2018-ci ildə Azərbaycanda iqtisadi canlanma gözlənilir. Bu il səhmdarları tərəfindən 2 dəfə kapitalı artırılan “AccessBank” gələn il daha aktiv fəaliyyət göstərməyi, böyüməyi və gəlirlərini artırmağı hədəfləyir.