Göyçay rayonunun iqtisadiyyatı üçün əhəmiyyəti olan bir sıra obyektlərin tikintisinə başlanılıb. Bu işlər özəl investisiyalar hesabına həyata keçirilir.

Belə ki, hazırda rayonun Yalman kəndində yerli iş adamının vəsaiti hesabına 2500 tonluq soyuducu anbar kompleksi, xurma qurutma və çeşidləmə müəssisəsi, logistik mərkəz inşa edilir. Yaxın vaxtlarda həmin ərazidə plastik və karton qablaşdırma müəssisəsi, meyvə kompotları istehsalı sexləri, soyuducu anbar kompleksləri də inşa olunacaq.

Həmçinin “AzNar” Qapalı Səhmdar Cəmiyyəti tərəfindən özəlləşdirilmiş keçmiş pambıq əyirici fabrikinin bazasında hazırda yeni istehsal sahələrinin yaradılması istiqamətində yenidənqurma və uyğunlaşdırma işləri davam etdirilir. Bu məqsədlə fabrikin üçmərtəbəli inzibati və istehsalat korpuslarında əsaslı təmir işləri aparılıb. Yaxın müddətdə həmin fabrikdə meyvə qurudulması və karton materiallarının emalı sexləri, şərab istehsalı müəssisəsi və digər istehsal sahələri yaradılacaq. Cəmiyyətin ərazisində 2400 kvadratmetr ərazidə müasir tipli 2500 tonluq soyuducu anbarın tikilməsi nəzərdə tutulur. Yeni istehsal sahələrinin elektrik enerjisi ilə etibarlı təchizatını təmin etmək üçün 2 min kvt gücündə paylayıcı elektrik məntəqəsi yaradılır, yeni istehsal sahələrinə xidmət edəcək ərazidaxili kommunikasiyalar yenidən qurulur.

Yerli iş adamlarının vəsaiti hesabına rayonda yeni xidmət sahələrinin yaradılması istiqamətində tədbirlər bununla yekunlaşmır. Bu yaxınlarda rayonun Cəyirli kəndinin ərazisində regionun ən iri tikinti materiallarının topdan və pərakəndə satış bazası istifadəyə verilib. Hazırda ərazidə inşa edilən “yaşıl market”in tikintisində son tamamlama işləri görülür. Həmçinin Göyçay şəhərində yeni avtovağzal binasının tikintisinə başlanılıb.

Qeyd edək ki, bu ilin yanvar-sentyabr aylarında Sahibkarlığa Kömək Milli Fondunun vəsaiti hesabına Göyçay rayonundan olan 8 sahibkarlıq subyektinə 1 milyon 295 min 700 manat güzəştli kredit verilib. Yerli sahibkarlar və iş adamları onlar üçün yaradılan əlverişli şəraitdən yararlanaraq rayonun sosial-iqtisadi inkişafının sürətləndirilməsində, əhalini narahat edən problemlərin həllində fəal iştirak edirlər.

© Azərtac