Dövlət gələn il sosial ipotekaya 250 milyon manata ayırarkən, Beynəlxalq Bankın borclarının bir hisəsinin qaytarılmasına təxminən 442 milyon manat yönəldəcək.

2018-ci ilin dövlət büdcəsində dövlət borclarına xidmətlə bağlı xərclər (əsas borc və faizlər üzrə xərclər) üçün 2 milyard 262,8 milyon manat vəsait nəzərdə tutulmuşdur ki, bu da 2017- ci illə müqayisə 621,0 milyon manat və ya 37,8 faiz çoxdur.

"Marja" xəbər verir ki, bu, Azərbaycan Respublikasının 2018-ci ilin dövlət və icmal büdcələri üzrə layihələrin təqdimatında bildirilir. 

Təqdimatda deyilir: Bu artım əsasən “Azərbaycan Beynəlxalq Bankı” Açıq Səhmdar Cəmiyyətinin (ABB) sağlamlaşdırılma tədbirləri çərçivəsində qəbul edilmiş könüllü restrukturizasiya planına uyğun olaraq dövlətin üzərinə keçmiş xarici kreditorlar qarşısında olan öhdəliklərinə xidmət olunması ilə bağlı xərclərin 2018-ci ilə düşən hissəsi (441,9 milyon manat) ilə əlaqədardır.

Belə ki, 2017-ci il 1 sentyabr tarixində Azərbaycan Respublikası Hökuməti tərəfindən 2 milyard 265,9 milyon ABŞ dolları həcmində emissiya edilmiş xarici valyutada denominasiya olunan dövlət istiqrazları İrlandiyanın fond birjasında qeydiyyata alınmış və ABB-nın kreditorlarına təqdim edilmişdir. 

Qeyd edilməlidir ki, ABB-nın kreditorlar qarşısında öhdəliklərinin dövlətə ötürülməsi üçün “Azərbaycan Respublikasının 2017-ci il dövlət büdcəsi haqqında” Azərbaycan Respublikasının Qanununda dəyişikliklər edilərək, xarici dövlət borclanmasının yuxarı həddi (limiti) 4,0 milyard manat məbləğində artırılmışdır. Göstərilən dövlət istiqrazlarının buraxılması dövlət borcunun nisbətən artması ilə nəticələnsə də hazırda dövlət borcu dayanıqlı səviyyədədir.

Bununla yanaşı, qeyd olunmalıdır ki, dövlətin orta və uzunmüddətli borc siyasəti strategiyası hazırlanmışdır. Strategiyada borcun tədricən azaldılması növbəti ildən başlayaraq dövlətin birbaşa və dövlət zəmanəti əsasında dövlət müəssisələrinin xarici kredit qurumlarından borc alınmasının sərt çərçivələri müəyən olunmuş və yalnız ölkənin prioritet hesab edilən layihələrinin maliyyələşdirilməsi üçün kredit vəsaitlərinin cəlb edilməsi nəzərdə tutulmuşdur.

Azərbaycan Respublikasının 2018-ci il üzrə daxili dövlət borclanmasının yuxarı həddi
(limiti) 700,0 milyon manat (2017-ci ilə nisbətən 300,0 milyon manat və ya 30,0 faiz az), xarici dövlət borclanmasının yuxarı həddi (limiti) 1 milyard manat (2017-ci ilə nisbətən 3,5 milyard manat və ya 77,8 faiz az), il ərzində veriləcək dövlət zəmanətlərinin məbləğinin yuxarı həddi (limiti) 4 milayrd manat (2017-ci ilə nisbətən 6 milyard manat və ya 60,0 faiz az) məbləğində proqnozlaşdırılmışdır. Bununla yanaşı, dövlətə məxsus olan hüquqi şəxslərin birbaşa borclanmasının da sərtləşdirilməsi isitiqamətində zəruri addımlar atılmışdır.