Dünyanın aparıcı foto və vizual məzmun təminatçılarından biri olan Getty Images maliyyə vəziyyətini yaxşılaşdırmaq və borclarını restrukturizasiya etmək məqsədilə ABŞ-da məhkəməyə müflisləşmə prosedurunun başlanması üçün müraciət edib.

Marja.az xəbər verir ki, şirkət oktyabrın 21-də ABŞ-ın Delaver ştatının müflisləşmə məhkəməsində “Chapter 11” proseduruna başlayıb. Bu addım kreditorlarla əvvəlcədən razılaşdırılmış maliyyə restrukturizasiyası planının həyata keçirilməsinə xidmət edir. 

ABŞ qanunvericiliyində “Chapter 11” proseduru şirkətlərə fəaliyyətlərini dayandırmadan borclarını yenidən strukturlaşdırmaq və maliyyə vəziyyətlərini sağlamlaşdırmaq imkanı verir.

Getty Images bildirib ki, restrukturizasiya prosesi ərzində normal fəaliyyətini davam etdirəcək. Şirkətin əməkdaşlarının, müştərilərinin, tərəfdaşlarının və məzmun təminatçılarının prosesdən mənfi təsirlənməsi gözlənilmir.

533 MİLYON DOLLARLIQ YENİ İNVESTİSİYA NƏZƏRDƏ TUTULUR

Getty Images-ın oktyabrın 12-də elan etdiyi razılaşmaya əsasən, Getty ailəsinə bağlı şirkətlər və ABŞ-ın Koch Equity Development investisiya qurumu tərəfindən şirkətə 533 milyon dollaradək yeni kapital qoyulması planlaşdırılır.

Restrukturizasiya planı çərçivəsində 270 milyon dollarlıq təminatsız istiqraz borcunun ləğv edilməsi, digər borclar üzrə faiz xərclərinin azaldılması və ödəniş müddətlərinin uzadılması nəzərdə tutulur. 

Getty Images-ın baş icraçı direktoru (CEO) Craig Peters bildirib ki, müflisləşmə proseduruna başlanılması əvvəllər açıqlanmış restrukturizasiya planının həyata keçirilməsi istiqamətində növbəti addımdır.

Onun sözlərinə görə, şirkət adi fəaliyyətini davam etdirir və maliyyə öhdəliklərinin yenidən tənzimlənməsi məzmun və xidmətlərin inkişafına daha çox investisiya yatırılmasına şərait yaradacaq.

Şirkət restrukturizasiya prosesini 2026-cı ilin sonunadək başa çatdırmağı planlaşdırır.

Proses tamamlandıqdan sonra Getty Images-ın birjada səhmləri alınıb-satılan şirkət statusundan çıxması və Getty ailəsi ilə Koch Equity Development-a bağlı qurumların tam nəzarətində olan özəl şirkətə çevrilməsi gözlənilir.

SHUTTERSTOCK İLƏ 3,7 MİLYARD DOLLARLIQ BİRLƏŞMƏ BAŞ TUTMAYIB

Getty Images-ın maliyyə çətinlikləri rəqibi Shutterstock ilə planlaşdırılan birləşmə layihəsinin uğursuzluğundan sonra daha çox diqqət çəkməyə başlayıb.

Şirkətlər 2025-ci ilin yanvarında təxminən 3,7 milyard dollar dəyərində birləşmə barədə razılığa gəlmişdilər.

Lakin Böyük Britaniyanın Rəqabət və Bazarlar İdarəsi (CMA) bazarda rəqabətin məhdudlaşdırılması ilə bağlı narahatlıqlar səbəbindən sövdələşməyə əlavə şərtlər irəli sürüb.

Tənzimləyici qurum Shutterstock-ın redaksiya məzmunu biznesinin satılmasını tələb edib. Getty Images bu şərtlə razılaşmayaraq 2026-cı ilin iyulunda birləşmə müqaviləsini ləğv edib. 

ŞİRKƏTİN BORCU 2,1 MİLYARD DOLLARA ÇATIB

Getty Images-ın avqust ayında açıqladığı ikinci rüb üzrə maliyyə hesabatında 85,8 milyon dollar xalis zərər qeydə alınıb.

2026-cı ilin iyun ayının sonuna şirkətin ümumi borcu təxminən 2,1 milyard dollar təşkil edib.

Maliyyə vəziyyətinin pisləşməsi şirkətin səhmlərinə də ciddi təsir göstərib.

Səhm qiymətinin həddindən artıq aşağı düşməsi səbəbindən Getty Images-ın səhmlərinin Nyu-York Fond Birjasında ticarəti sentyabrın 29-da dayandırılıb. Sentyabrın 30-dan etibarən səhmlər birjadankənar bazarda (OTC) alınıb-satılmağa başlayıb.

Şirkətin maliyyə çətinlikləri yüksək borc yükü, rəqabətin güclənməsi və süni intellekt vasitəsilə yaradılan vizual məzmunun ənənəvi foto bazarına təsiri fonunda baş verir.