“MJ Finance Bank Olmayan Kredit Təşkilatı” ASC 2025-ci ildə aktivlərini və kapitalını kəskin artırıb. Bununla belə, şirkətin vergidən əvvəlki mənfəəti və məcmu gəliri azalıb, 30 gündən çox gecikdirilmiş kreditlərin portfeldəki payı isə 22,45%-ə yüksəlib.

Marja.az şirkətin açıqladığı audit olunmuş maliyyə göstəricilərinə istinadən xəbər verir ki, 2025-ci ilin sonunda “MJ Finance”ın cəmi aktivləri 21 milyon 966 min 818 manat təşkil edib. Aktivlər 2024-cü illə müqayisədə 7 milyon 180 min 287 manat və ya 48,6% artıb.

Kredit portfeli böyüyüb

Müştərilərə verilmiş xalis kreditlər və avansların həcmi 2 milyon 284 min 186 manat və ya 16,3% artaraq 16 milyon 315 min 317 manata çatıb. Bu göstərici 2024-cü ilin sonunda 14 milyon 31 min 131 manat idi.

Şirkətin portfel keyfiyyəti üzrə ayrıca təqdim etdiyi məlumatda ümumi kredit portfeli 18 milyon 149 min 471 manat göstərilib. Həmin portfel 2024-cü illə müqayisədə 13% böyüyüb. 

Hər gün yeni vakansiyalar - AzVak.az-da

2025-ci ilin sonunda 30 gündən çox gecikdirilmiş kreditlərin — PAR>30 portfelinin məbləği 4 milyon 74 min 125 manata yüksəlib. Bu, əvvəlki illə müqayisədə 1 milyon 44 min 491 manat və ya 34,5% artım deməkdir.

PAR>30 kreditlərinin ümumi portfeldəki payı 18,82%-dən 22,45%-ə yüksəlib. Beləliklə, hər 100 manatlıq kredit portfelinin təxminən 22 manat 45 qəpiyi 30 gündən artıq gecikmiş kreditlərin payına düşüb.

Gecikmiş və təminatsız kreditlərin məbləği də 730 min 213 manatdan 975 min 551 manata çatıb. Onların portfeldəki payı 4,54%-dən 5,38%-ə yüksəlib.

Şirkət bildirir ki, vaxtı keçmiş kreditlərin böyük hissəsi yüksək likvidli girovlarla təmin olunub. Buna görə təminatsız və birbaşa risk altında olan hissənin ümumi portfeldəki payı daha aşağıdır.

Kapital 81% artıb

“MJ Finance”ın cəmi kapitalı 2025-ci ildə 5 milyon 953 min 721 manat və ya 80,7% artaraq 13 milyon 327 min 470 manata çatıb. Kapitaldakı yüksəlişdə nizamnamə kapitalının 5 milyon 100 min 170 manata çatdırılması mühüm rol oynayıb. Şirkət bu addımın maliyyə dayanıqlığını gücləndirdiyini və investorların əlavə dəstəyini göstərdiyini bildirib.

Öhdəliklər isə 1 milyon 226 min 566 manat və ya 16,5% artaraq 8 milyon 639 min 348 manat olub. Kapitalın öhdəliklərdən daha sürətlə artması balansın maliyyələşmə strukturunu gücləndirib.

Faiz gəlirləri artıb

Şirkətin xalis faiz gəlirləri 4,6% artaraq 9 milyon 1 min 692 manata yüksəlib. Bununla belə, vergidən əvvəlki mənfəət 562 min 342 manat və ya 12,2% azalaraq 4 milyon 35 min 775 manat təşkil edib. Cəmi məcmu gəlir isə 794 min 121 manat və ya 18,6% azalaraq 3 milyon 466 min 774 manata düşüb.

2025-ci ildə “MJ Finance” balansını və kapital bazasını əhəmiyyətli dərəcədə böyüdüb. Lakin gəlirlilik göstəricilərinin zəifləməsi və problemli kreditlərin kredit portfelindən daha sürətlə artması risklərin idarə edilməsini əsas diqqət nöqtəsinə çevirir.

Kapitalın güclənməsi mümkün kredit itkilərinə qarşı maliyyə buferini artırsa da, PAR>30 göstəricisinin 22,45%-ə yüksəlməsi növbəti dövrlərdə kreditlərin yığılması və portfel keyfiyyətinin yaxşılaşdırılmasını vacib edir.

Hər gün yeni vakansiyalar - AzVak.az-da