“KollektA” ASC nizamnamə kapitalını kəskin artırmaq məqsədilə 205 min manatlıq səhm emissiyası həyata keçirməyə hazırlaşır.

Marja.az şirkətin emissiya prospektinə istinadən xəbər verir ki, “KollektA” hər birinin nominal və satış qiyməti 410 manat olan 500 ədəd yeni adi, adlı, sənədsiz səhm buraxacaq. Hazırda şirkətin dövriyyədə hər birinin nominal dəyəri 410 manat olan cəmi 10 səhmi mövcuddur.

Şirkətin hazırkı nizamnamə kapitalı 4 min 100 manatdır. Emissiya tam yerləşdirilərsə, kapital 205 min manat artırılaraq 209 min 100 manata çatacaq. Beləliklə, “KollektA”nın nizamnamə kapitalı 51 dəfə böyüyəcək və ya 5000% artacaq.

Səhmlərin kütləvi təklif üsulu ilə Bakı Fond Birjasında yerləşdirilməsi nəzərdə tutulur. Anderrayter “Troni İnvestisiya Şirkəti” QSC olacaq. Bir səhmin satış qiyməti 410 manat müəyyən edilib.

Emissiyadan ümumilikdə 205 min manat cəlb edilməsi nəzərdə tutulsa da, xərclər çıxıldıqdan sonra şirkətin əldə edəcəyi xalis vəsaitin 194 min 97,5 manat olacağı gözlənilir. Prospektə əsasən, bu vəsait “KollektA”nın dövriyyə kapitalının artırılmasına yönəldiləcək.

Mövcud səhmdarlar yeni buraxılan səhmləri öz paylarına mütənasib şəkildə almaqda üstünlük hüququna malikdirlər.

Həmçinin oxu

Problemli kreditləri yığan şirkət bazardan 5 milyon manat cəlb edir - İnvestorlara 16% gəlir təklifi

“KollektA” 2025-ci ildə 2,9 milyon manat mənfəət əldə edib

Emissiya prospektində şirkətin maliyyə göstəriciləri də açıqlanıb.

2025-ci ildə “KollektA”nın cəmi gəlirləri 7 milyon 698 min manat təşkil edib. Bunun 6 milyon 962 min manatı faiz gəlirlərinin, 735,6 min manatı isə digər əməliyyat gəlirlərinin payına düşüb.

Şirkətin vergidən əvvəlki mənfəəti 3 milyon 689 min manat, xalis mənfəəti isə 2 milyon 907 min 819 manat olub. Ümumi və inzibati xərclər 3 milyon 443 min manat, faiz xərcləri isə 566 min manata yaxın təşkil edib.

2025-ci ilin sonunda şirkətin aktivləri 9 milyon 659,8 min manat, öhdəlikləri 6 milyon 743,5 min manat, kapitalı isə 2 milyon 916,3 min manat olub.

Aktivlərin tərkibində alınmış problemli kredit portfeli 4 milyon 836,4 min manat, verilmiş borclar 2 milyon 722,1 min manat, pul vəsaitləri isə 1 milyon 60,4 min manat təşkil edib.

Şirkət 9 oktyabr 2024-cü ildə qeydiyyatdan keçdiyi üçün 2024-cü ilin nəticələri tam maliyyə ilini deyil, yalnız fəaliyyətə başladığı tarixdən ilin sonunadək olan dövrü əhatə edir. Buna görə 2025-ci ilin göstəricilərini 2024-cü illə birbaşa illik artım faizi kimi müqayisə etmək düzgün olmaz.

“KollektA” nə iş görür?

“KollektA” maliyyə və kollektor – borcların yığılması – sektorunda fəaliyyət göstərir. Şirkət banklardan və digər maliyyə institutlarından problemli kredit portfelləri üzrə tələb hüquqlarını alır, həmin borcların yığılmasını həyata keçirir və üçüncü tərəflərə debitor borcların yığılması xidmətləri göstərir.

Şirkətin işçi sayı isə 187 nəfər olub.

Hər gün yeni vakansiyalar - AzVak.az-da