İspaniyanın “Savener” mühəndislik şirkəti Azərbaycanda dəniz suyunun duzsuzlaşdırılması üzrə zavodun tikintisində mühəndis-layihələndirmə işlərini yerinə yetirmək üçün seçilib. İspaniya mətbuatının yaydığı məlumata görə, şirkət Sumqayıtda əks-osmos üsulu ilə dəniz suyunun duzsuzlaşdırılması üzrə yeni qurğunun layihələndirilməsinə dair müqaviləni qazanıb.

“Savener” şirkətini baş podratçı kimi çıxış edən HDEC (“PowerChina” qrupuna daxil olan “Huadong Engineering Corporation”) korporasiyası cəlb edib, layihənin developeri isə Səudiyyə Ərəbistanının “ACWA Power” şirkətidir. İspan şirkəti artıq tam şəkildə layihə üzərində işə qoşulub.

Layihə Sumqayıt Kimya Sənaye Parkının ərazisində sutkada 300 min kubmetr gücündə dəniz suyunun duzsuzlaşdırılması zavodunun tikintisini nəzərdə tutur. İcranı Səudiyyə Ərəbistanının “ACWA Power” və Türkiyənin “IC İçtaş İnşaat” şirkətinin daxil olduğu konsorsium həyata keçirir.

Qeyd edək ki, su sektorunda zəngin təcrübəyə malik olan “Savener” şirkəti əvvəllər Qubra III və Barka V (Oman), Şuvayxat və Tavila (BƏƏ), Əl-Xafci və Şüeybə III (Səudiyyə Ərəbistanı), Salala (Oman) və Mərakeşdəki obyektlər də daxil olmaqla, dünyanın bir sıra ən böyük duzsuzlaşdırma zavodlarının yaradılmasında iştirak edib.

Azərbaycan Dövlət Su Ehtiyatları Agentliyinin məlumatına əsasən, bu ərazi 29,63 hektar sahəni və sahil zolağını əhatə edir. İqtisadiyyat Nazirliyinin İqtisadi Zonaların İnkişafı Agentliyinin balansında olan bu ərazidə tikiləcək duzsuzlaşdırma zavodunun illik istehsal gücü 100 milyon kubmetr təşkil edir ki, bu da Abşeron yarımadasının hazırkı su tələbatının 20 faizi deməkdir. Ümumilikdə isə, bu irimiqyaslı infrastruktur obyekti vasitəsilə, təxminən, 3 milyon insanın içməli su ilə təminatı həyata keçiriləcək.

Qurumdan o da bildirilib ki, 2026-2028-ci illərdə Sumqayıt Duzsuzlaşdırma Zavodundan Ceyranbatan su anbarına qədər magistral kəmərin tikintisi nəzərdə tutulub. Dəyəri 407 milyon ABŞ dollar olan layihənin müddəti 27,5 il təşkil edir. Bunun da 2,5 ilini tikinti, 25 ilini isə istismar dövrü əhatə edəcək. Bu müddət başa çatdıqdan sonra obyektin idarə edilməsi Azərbaycan Dövlət Su Ehtiyatları Agentliyinə veriləcək.

İş elanları AzVak.az-da

© "Xalq Qəzeti"