“Rabitəbank” ASC-nin səhmdar strukturunda dəyişiklik baş verib.

Marja.az-ın məlumatına görə, Bankın 31 dekabr 2025-ci il və 30 iyun 2026-cı il tarixlərinə açıqladığı səhmdar siyahılarının müqayisəsi göstərir ki, “Bakı Telefon Rabitəsi” MMC (“Baktelecom”) artıq “Rabitəbank”ın səhmdarları sırasında yer almır. Eyni zamanda, “Aztelekom” MMC-nin bankdakı səhmlərinin sayı 2 dəfədən çox artıb.

31 dekabr 2025-ci il tarixinə “Baktelecom” “Rabitəbank”ın 2 305 səhminə sahib olub. Bu, bankın nizamnamə kapitalında 0,0462% xüsusi çəkiyə bərabər idi.

Həmin tarixdə “Aztelekom” MMC-nin “Rabitəbank”da 2 200 səhmi və ya 0,0441% payı olub.

30 iyun 2026-cı il tarixinə olan məlumatda isə “Baktelecom” ayrıca səhmdar kimi göstərilmir. “Aztelekom”un sahib olduğu səhmlərin sayı 4 505-ə, nizamnamə kapitalındakı payı isə 0,0902%-ə yüksəlib.

Beləliklə, “Aztelekom”un “Rabitəbank”dakı səhmlərinin sayı 2 305 ədəd və ya təxminən 104,8% artıb.

Artımın məhz 2025-ci ilin sonunda “Baktelecom”a məxsus olan 2 305 səhmə bərabər olması diqqət çəkir. Bu dəyişiklik “Bakı Telefon Rabitəsi” MMC-nin (“Baktelecom”) “Aztelekom” MMC-yə birləşdirilməsi ilə əlaqədardır.

Nəticədə, 2025-ci ilin sonunda “Baktelecom” və “Aztelekom”un birlikdə sahib olduğu 4 505 “Rabitəbank” səhmi 30 iyun 2026-cı il tarixinə tam şəkildə “Aztelekom” MMC-nin adına göstərilib.

Bankın digər əsas səhmdarlarının paylarında dəyişiklik olmayıb.

30 iyun 2026-cı il tarixinə “Rabitəbank” ASC-nin səhmdar strukturu belədir:

- Əliyev Rauf Zeynal oğlu – 38,60% və ya 1 927 148 səhm

- Abasova Validə Maarif qızı – 34,64% və ya 1 729 438 səhm

- Nuriyev Zakir Əlibala oğlu – 11,4835% və ya 573 325 səhm

- Nuriyeva Dilarə Nəsrəddin qızı – 9,1099% və ya 454 820 səhm

- Xasiyev Aslan Tarqulu oğlu – 6,0272% və ya 300 915 səhm- “Aztelekom” MMC – 0,0902% və ya 4 505 səhm

- “Bakcell” MMC – 0,0240% və ya 1 200 səhm

- Dövlət Radiotezlikləri İdarəsi – 0,0120% və ya 600 səhm

- “Teleradio” İB – 0,0080% və ya 400 səhm

- “Bakı Teleqrafı” ASC – 0,0040% və ya 200 səhm

- “Azerbaijan International Telecom (AzInTelecom)” MMC – 0,0012% və ya 60 səhm

Hər iki hesabat tarixində “Rabitəbank”ın səhmlərinin ümumi sayı 4 992 611 ədəd təşkil edib. Buna görə də dəyişiklik yeni səhmlərin buraxılması ilə deyil, mövcud səhmlərin səhmdarlar arasında struktur dəyişikliyi ilə bağlı olub.