Beynəlxalq reytinq agentliyi Fitch Ratings AFB Bankın uzunmüddətli emitent defolt reytinqini (Long-Term IDR) “B” səviyyəsində “Stabil” proqnozla təsdiqləyib.

Bankın yaydığı pressrelizdə bildirilir ki, agentliyin 7 avqust 2026-cı il tarixində açıqladığı qiymətləndirmədə Bankın aktivlərinin keyfiyyətində müşahidə olunan yaxşılaşma, güclü kapital göstəriciləri, sürətlə genişlənən depozit bazası və mövcud likvidlik ehtiyatı qeyd olunur.

Fitch Ratings-in hesabatına əsasən, AFB Bankda problemli kreditlərin səviyyəsində əhəmiyyətli azalma qeydə alınıb. Belə ki, 2025-ci ilin sonunda problemli kreditlərin ümumi kredit portfelində payında əvvəlki illə müqayisədə iki dəfəyə yaxın yaxşılaşma qeydə alınıb.

Agentlik bu müsbət dinamikanın davam edəcəyini proqnozlaşdırır. Fitch-in gözləntilərinə görə, Mərhələ 3 və dəyərsizləşmiş kreditlər də daxil olmaqla, problemli kreditlərin payı 2026-cı ildə təxminən 4%-ə qədər azalaraq, 2027-ci ildə də bu səviyyəyə yaxın qala bilər. Bu dinamika əvvəlki dövrlərdən qalan kreditlər üzrə daxilolmalar, portfelin təmizlənməsi və kredit portfelinin artımı ilə əlaqələndirilir.

AFB Bankın kapital mövqeyi də Fitch tərəfindən diqqətə alınan əsas göstəricilər sırasındadır. 2026-cı ilin birinci yarısının sonunda Bankın I dərəcəli kapital əmsalı 16% təşkil edib və agentlik tərəfindən güclü səviyyə kimi qiymətləndirilib.

Hesabatda Bankın depozit bazasının artımı da xüsusi qeyd olunur. Müştəri depozitləri 2025-ci ildə 72%, 2026-cı ilin ilk altı ayında isə əlavə olaraq 56% artıb. Fitch bildirir ki, bu artım bank sektorunun orta göstəricilərini üstələyib və AFB Bankın inkişaf strategiyasını əks etdirir.

2026-cı ilin birinci yarısının sonunda müştəri depozitləri Bankın öhdəliklərinin 76%-ni təşkil edib. Eyni zamanda, Fitch AFB Bankın sürətlə genişlənən depozit bazası fonunda likvidlik mövqeyini məqbul qiymətləndirərək, mövcud likvidlik ehtiyatlarını Bankın maliyyə dayanıqlığını dəstəkləyən mühüm amillərdən biri kimi qeyd edib.

Bankın kredit portfelinin inkişafında da yüksək dinamika müşahidə olunub. 2026-cı ilin ilk yarısında kredit portfeli 35% artıb. Artım əsasən pərakəndə və kiçik və orta biznes seqmentlərinin maliyyələşdirilməsi hesabına formalaşıb.

Fitch Ratings eyni zamanda Azərbaycanın bank sektoru üzrə əməliyyat mühitinin qiymətləndirilməsini “bb-” səviyyəsindən “bb” səviyyəsinə yüksəldib və proqnozu “Stabil” saxlayıb. Agentlik bunu tənzimləyici nəzarətin gücləndirilməsi və risk əsaslı nəzarət mexanizmlərinin inkişafı ilə əlaqələndirir. Fitch-in qiymətləndirməsinə əsasən, Azərbaycanın bank sektorunun maliyyə profilinin 2026–2027-ci illərdə sağlam qalacağı gözlənilir.

AFB Bank üzrə reytinqin “B” səviyyəsində və “Stabil” proqnozla təsdiqlənməsi Bankın mövcud kredit profilinin beynəlxalq reytinq agentliyi tərəfindən növbəti dəfə qiymətləndirilməsinin nəticəsidir. Aktivlərin keyfiyyətinin yaxşılaşması, depozit bazasının genişlənməsi, kapital mövqeyinin güclü qalması və likvidliyin məqbul səviyyədə saxlanılması Bankın növbəti inkişaf mərhələsi üçün mühüm maliyyə göstəriciləridir.

İş elanları AzVak.az-da