Almaniyanın əczaçılıq və kimya şirkəti “Bayer”in “Roundup” məhkəmə iddiaları ilə əlaqədar ödədiyi məbləğ 10 milyard dolları keçib.

Marja xəbər verir ki, Şirkət minlərlə iddianı əhatə edən 7,25 milyard dollarlıq yeni barışıq sazişi ilə bağlı məhkəmənin qərarını da gözləyir.

“Bayer”in “Monsanto” bölməsi və iddiaçıların vəkilləri barışıq sazişinə baxılacaq məhkəmə iclasının təxirə salınması üçün Missuri ştatındakı məhkəməyə birgə müraciət ediblər.

“Bloomberg”in məlumatına görə, tərəflər avqustun 19-na planlaşdırılan məhkəmə iclasının sentyabrın 10-na keçirilməsini istəyiblər. “Bayer” bildirib ki, təxirəsalma barışıq sazişindən çıxmaq barədə qərarını geri götürmək istəyən şəxslərin müraciətlərinin işlənməsi üçün zəruridir.

Məhkəmə “Roundup” adlı herbisidin xərçəng xəstəliyinə səbəb olduğu iddiası ilə qaldırılmış minlərlə iddianı əhatə edən 7,25 milyard dollarlıq barışıq sazişini təsdiqləyib-təsdiqləməyəcəyinə qərar verəcək.

Bu qərar “Bayer”in iyun ayında ABŞ Ali Məhkəməsində əldə etdiyi hüquqi qələbədən sonra şirkət üçün növbəti mühüm mərhələ olacaq.

ABŞ Ali Məhkəməsi “Roundup”ın onda qeyri-Hodgkin limfomasına səbəb olduğunu iddia edən Missuri sakininin xeyrinə çıxarılmış münsiflər heyəti qərarını ləğv etmişdi. Məhkəmə federal tənzimləyici qurumların məhsulun etiketində xərçəng riskinə dair xəbərdarlığın yerləşdirilməsini zəruri hesab etmədiklərinə diqqət çəkmişdi. Buna görə də istehlakçıların etiketdə müvafiq xəbərdarlığın olmamasına görə “Bayer”i məsuliyyətə cəlb edə bilməyəcəyinə qərar verilmişdi.

“Bayer”in baş icraçı direktoru Bill Anderson şirkətin üzərindəki hüquqi yükü bu il ərzində “əhəmiyyətli dərəcədə məhdudlaşdırmağı” hədəflədiklərini açıqlamışdı.

“Bayer” “Roundup” herbisitinin istehsalçısı “Monsanto”nu 2018-ci ildə satın alıb və məhsulla bağlı hüquqi problemləri də öz üzərinə götürüb. “Roundup” iddialarının şirkətə indiyədək ümumi maliyyə yükü 10 milyard dolları ötüb.

İş elanları AzVak.az-da