2026-cı il iyulun 29-da Xaçmaz rayonunun Xudat şəhərində yerləşən Food City Agrocomplex logistika klasterində Azərbaycan Respublikası Dövlət Gömrük Komitəsinin nümayəndə heyəti başda sədr müavini Fuad Məmmədov olmaqla, Braziliya Gömrük Administrasiyasının rəhbəri Fabiano Koelho, Ümumdünya Gömrük Təşkilatının (WCO) regional rəhbəri Antonio Lo Parko və digər nümayəndələrin iştirakı ilə işgüzar görüş keçirilib.

Səfər çərçivəsində qonaqlara kompleksin infrastrukturu təqdim olunub.

Nümayəndə heyəti quru və soyuducu anbarlar, müvəqqəti saxlanc statuslu gömrük anbarları, qida laboratoriyası, əmtəə birjası, meyvə çeşidləmə və qablaşdırma xətləri, gömrük nəzarət zonası, TIR terminalı, dəmir yolu infrastrukturu və özəl vaqon parkı ilə tanış olub.

Görüş zamanı əsas diqqət Food City Agrocomplex-də tətbiq olunan "bir pəncərə" sistemi və kompleksə Səlahiyyətli İqtisadi Operator (SİO) statusunun verilməsi təşəbbüsü üzərində cəmlənib. Tərəflər bu statusun logistika klasterinə verilməsinin yarada biləcəyi potensial üstünlüklər, gömrük prosedurlarının sadələşdirilməsi, etibarlı ticarətin təşviqi, rəqəmsal inteqrasiyanın genişləndirilməsi və beynəlxalq təchizat zəncirlərinin səmərəliliyinin artırılması istiqamətində fikir mübadiləsi aparıblar.

Qeyd olunub ki, Food City Agrocomplex-də Azərbaycan Respublikası Dövlət Gömrük Komitəsi, Azərbaycan Respublikasının Qida Təhlükəsizliyi Agentliyi (AQTA), Azərbaycan Respublikası Prezidenti yanında Antiinhisar və İstehlak Bazarına Nəzarət Dövlət Agentliyi, İqtisadiyyat Nazirliyi yanında Dövlət Vergi Xidməti, Kənd Təsərrüfatı Nazirliyinin Dövlət Aqrar İnkişaf Mərkəzi (DAİM) və digər aidiyyəti qurumlar vahid məkanda fəaliyyət göstərərək inteqrasiya olunmuş xidmət modeli vasitəsilə xarici ticarət əməliyyatlarının daha operativ və səmərəli həyata keçirilməsinə dəstək verirlər.

Müzakirələr zamanı Şimal–Cənub Beynəlxalq Nəqliyyat Dəhlizi üzrə tranzit və reeksport potensialının artırılması, gömrük prosedurlarının sürətləndirilməsi və rəqəmsal inteqrasiya sahəsində beynəlxalq təcrübənin tətbiqi məsələləri də nəzərdən keçirilib.

Səfər çərçivəsində Braziliya Gömrük Administrasiyasının rəhbəri Fabiano Coelho Food City Agrocomplex-də yaradılmış logistika infrastrukturu və xüsusilə "bir pəncərə" modelinə maraq göstərərək bu istiqamətdə təcrübə mübadiləsinin əhəmiyyətini vurğulayıb.

Food City Agrocomplex-in Baş İcraçı Direktoru Anar Ağayev bildirib:

“Food City Agrocomplex Şimal–Cənub Beynəlxalq Nəqliyyat Dəhlizi üzərində yerləşən strateji logistika klasteridir. Burada tətbiq olunan "bir pəncərə" modeli dövlət və özəl sektor arasında əməkdaşlığı gücləndirərək xarici ticarətin daha sürətli və səmərəli təşkilinə xidmət edir. Beynəlxalq tərəfdaşlarımızla aparılan müzakirələr bu modelin gələcək inkişafı üçün mühüm əhəmiyyət daşıyır.”

Food City Agrocomplex Xaçmaz rayonunun Xudat şəhərində, Şimal–Cənub Beynəlxalq Nəqliyyat Dəhlizi üzərində yerləşən çoxfunksiyalı logistika klasteridir. Kompleks "bir pəncərə" prinsipi əsasında fəaliyyət göstərərək xarici ticarət iştirakçılarına logistika, gömrük və digər dövlət xidmətlərini vahid məkanda təqdim edir.

İş elanları AzVak.az-da