Azərbaycanda vergi boşluğu son beş ildə əhəmiyyətli dərəcədə azalıb. Hazırda vergi potensialı ilə faktiki yığımlar arasındakı fərq 7-8 % təşkil edir. Dövlət Vergi Xidməti yaxın illərdə isə vergi inzibatçılığının daha da sadələşdirilməsi, mikro və kiçik biznesin dəstəklənməsi, daşınmaz əmlak bazarında vergi yükünün optimallaşdırılması və yeni güzəştlərin tətbiqini nəzərdə tutur.

Marja.az xəbər verir ki, bunu "Real TV" və "Azərtac"a müsahibəsində Dövlət Vergi Xidmətinin rəisi Orxan Nəzərli müsahibəsində bildirib.

Onun sözlərinə görə, kölgə iqtisadiyyatının dəqiq həcmini müəyyənləşdirmək olduqca çətindir və müxtəlif metodologiyalar fərqli nəticələr verir. Buna görə də Dövlət Vergi Xidməti kölgə iqtisadiyyatının mütləq həcmini deyil, onun dinamikasını izləyir.

Orxan Nəzərli qeyd edib ki, vergi inzibatçılığı baxımından əsas göstəricilərdən biri vergi boşluğudur. 

Vergi boşluğu 20 %-dən 7-8 %-ə düşüb

DVX rəhbərinin sözlərinə görə, vergi boşluğu Vergi Məcəlləsinə əsasən müəyyən oluna biləcək potensial vergi öhdəlikləri ilə dövlət büdcəsinə faktiki daxil olan vergi məbləği arasındakı fərqi(faizi) ifadə edir.

"Son beş il ərzində bu göstərici təxminən 20 faizdən 7-8 faizə qədər azalıb", – deyə Orxan Nəzərli bildirib.

Onun sözlərinə görə, heç bir ölkədə qanunvericilikdə nəzərdə tutulan bütün vergi öhdəliklərinin 100 % həcmdə toplanması mümkün olmur. Buna səbəb verginin gec ödənilməsi, ödənilməməsi və ya bəzi bizneslərin maliyyə çətinlikləri ilə üzləşməsidir.

DVX rəhbəri hesab edir ki, ƏDV geri al mexanizmi də vergi intizamının güclənməsinə və vergi boşluğunun azalmasına müsbət təsir göstərib.

2027-ci ildən yeni imkan

Orxan Nəzərli bildirib ki, vergi qanunvericiliyində növbəti mühüm dəyişikliklərdən biri artıq qəbul olunub.

Onun sözlərinə görə, Prezident tərəfindən imzalanmış qanuna əsasən, 2027-ci ildən etibarən qeyri-neft özəl sektorunda fəaliyyət göstərən biznes subyektlərinə ƏDV depozit hesabındakı vəsaitlərin sosial ödənişlərə yönəldilməsi imkanı veriləcək.

Bu mexanizm 4 il müddətində tətbiq olunacaq.

DVX rəhbəri qeyd edib ki, bu yenilik şəffaf fəaliyyət göstərən şirkətlərin dövriyyə vəsaitlərinə olan ehtiyacını azaldacaq və maliyyə resurslarından daha səmərəli istifadə etmələrinə şərait yaradacaq.

Mikro və kiçik biznes üçün yeni dəyişikliklər hazırlanır

Orxan Nəzərli bildirib ki, hazırda mikro və kiçik sahibkarlar üçün bəyannamələrin və vergi yükünün optimallaşdırılması istiqamətində iş aparılır.

Məqsəd bu kateqoriyadan olan vergi ödəyicilərinin böyüməsinə və inkişaf potensialının artırılmasına daha əlverişli şərait yaratmaqdır.

Daşınmaz əmlak bazarında da dəyişikliklər gözlənilir

DVX rəhbərinin sözlərinə görə, daşınmaz əmlak bazarında investisiyaların artırılması, bazarın daha şəffaf fəaliyyət göstərməsi və iqtisadi aktivliyin genişlənməsi məqsədilə vergi yükünün optimallaşdırılması imkanları da nəzərdən keçirilir.

Vergi xidmətlərinin əsas prioritetləri

Orxan Nəzərli bildirib ki, Dövlət Vergi Xidmətinin orta və uzunmüddətli strategiyası aşağıdakı istiqamətlərə əsaslanacaq:

- vergi xidmətlərinin sadələşdirilməsi;

- rəqəmsal həllərin genişləndirilməsi;

- hüquqi müəyyənliyin artırılması;

- preventiv məlumatlandırmanın gücləndirilməsi;

- risklərin əvvəlcədən idarə olunması.

Onun sözlərinə görə, əsas məqsəd vergi ödəyiciləri üçün daha proqnozlaşdırılan, rahat və əlçatan biznes mühitinin formalaşdırılmasıdır.

Hər gün yeni vakansiyalar - AzVak.az-da