Azərbaycanda vergi daxilolmalarının böyük hissəsi könüllü şəkildə ödənilir. Hazırda dövlət büdcəsinə daxil olan vergi vəsaitlərinin 92 %-dən çoxu vergi ödəyicilərinin öhdəliklərini könüllü icra etməsi hesabına formalaşır.

Marja xəbər verir ki, bunu "Real TV" və "Azərtac"a müsahibəsində Dövlət Vergi Xidmətinin rəisi Orxan Nəzərli müsahibəsində bildirib.

Onun sözlərinə görə, vergi mədəniyyəti uzun illər ərzində formalaşan mürəkkəb bir anlayışdır və bunu birbaşa ölçmək çətindir. Buna görə də Dövlət Vergi Xidməti vergi mədəniyyətinin əsas göstəricisi kimi könüllü vergi ödənişlərinin səviyyəsini izləyir.

"Daxili motivasiyanın ən konkret və ölçülə bilən göstəricilərindən biri məhz könüllü vergi ödənişləridir. Əgər vergi ödəyicisi öhdəliyini özü hesablayıb könüllü şəkildə ödəyirsə, bu, vergi mədəniyyətinin formalaşdığını göstərir", – deyə Orxan Nəzərli bildirib.

Dövlət Vergi Xidmətinin rəisi qeyd edib ki, hazırda ümumi vergi daxilolmalarının tərkibində könüllü ödənişlərin payı 92 %-dən yuxarıdır.

Onun sözlərinə görə, qeyri-neft-qaz sektorunda bu göstərici bir qədər aşağı olsa da, təxminən 90 % səviyyəsindədir.

Orxan Nəzərli bildirib ki, qeyri-neft-qaz sektorunda vergi daxilolmalarının yüksək templə artması ilə yanaşı, könüllü ödənişlərin də artması cəmiyyətdə vergi mədəniyyətinin gücləndiyini göstərir.

"Bu onu göstərir ki, vətəndaşlarımız dövlətin inkişafında iştirak etmək istəyir və vergilərini könüllü şəkildə ödəyirlər", – deyə o vurğulayıb.

Dövlət Vergi Xidmətinin rəisi əlavə edib ki, qurumun əsas məqsədi vergi ödəyiciləri üçün rahat ekosistem yaratmaqdır ki, vergi öhdəliyinin yerinə yetirilməsi əlavə yük kimi qəbul edilməsin.

Onun sözlərinə görə, vergi mədəniyyətinin yüksəldilməsi, könüllü əməletmənin artırılması və insan kapitalının gücləndirilməsi Dövlət Vergi Xidmətinin strateji hədəfləri sırasındadır.

Orxan Nəzərli qeyd edib ki, bu istiqamətlər üzrə müəyyən edilmiş göstəricilər mütəmadi izlənilir və son illər müsbət dinamika müşahidə olunur.

Hər gün yeni vakansiyalar - AzVak.az-da