"PAŞA Bank Gürcüstan"da rəhbərlik dəyişikliyi başa çatıb.

Marja.az xəbər verir ki, Pünhan Nərimanov 3 avqust 2026-cı il tarixindən "PAŞA Bank Gürcüstan"ın İdarə Heyətinin sədri vəzifəsinə təyin olunub.

Pünhan Nərimanov 2026-cı ilin iyununda İdarə Heyəti sədrinin müşaviri kimi banka qoşulub. O, əvvəlcədən planlaşdırılmış rəhbərlik dəyişikliyi çərçivəsində keçid prosesində iştirak edib və bankın fəaliyyətinin fasiləsiz davam etdirilməsinə dəstək göstərib.

Yeni rəhbərin bankçılıq, ödənişlər, xəzinədarlıq və maliyyə əməliyyatları sahələrində 20 ildən artıq iş təcrübəsi var.

Pünhan Nərimanov "PAŞA Bank Gürcüstan"a qoşulanadək “PASHA Pay”də idarəedici direktor və İdarə Heyəti sədrinin müavini vəzifələrində çalışıb. O, daha əvvəl “MilliÖn” və “Kapital Bank”da müxtəlif yüksək rəhbər vəzifələr tutub. Karyerası ərzində maliyyə xidmətlərinin və rəqəmsal ödənişlərin inkişafı, eləcə də əməliyyat səmərəliliyinin artırılması istiqamətində fəaliyyət göstərib.

Pünhan Nərimanov İspaniyanın IE Business School ali məktəbində “Executive MBA” proqramı üzrə magistr, Moscow University Touro-da isə biznesin idarə edilməsi və menecment ixtisası üzrə bakalavr dərəcəsi alıb.

PAŞA Maliyyə Holdinqi təyinatla bağlı açıqlamasında "PAŞA Bank Gürcüstan"ın qrupun regional fəaliyyətində mühüm yer tutduğunu bildirib. Holdinq Pünhan Nərimanovun təcrübə və liderlik bacarıqlarının bankın davamlı inkişafına, həmçinin müştərilər və tərəfdaşlar üçün yaradılan dəyərin artırılmasına töhfə verəcəyini gözləyir.

Ramil İmamov PAŞA Maliyyə Holdinqində yeni vəzifəyə keçib

PAŞA Bank Gürcüstan son üç il ərzində bankın İdarə Heyətinin sədri vəzifəsində çalışmış Ramil İmamova fəaliyyətinə görə təşəkkür edib.

Ramil İmamov 2026-cı ilin avqustundan etibarən PAŞA Maliyyə Holdinqinin baş icraçı direktorunun müşaviri vəzifəsində fəaliyyətini davam etdirir.

Bildirilib ki, bu dəyişiklik rəhbərlikdə varislik prosesinin və Ramil İmamovun qrup daxilində daha geniş karyera inkişafının əvvəlcədən planlaşdırılmış mərhələsidir.

Hər gün yeni vakansiyalar - AzVak.az-da