“Visa” sərtləşən rəqabət şəraitində səmərəliliyi artırmaq məqsədilə təxminən 2 min 600 əməkdaşını işdən çıxarmağa hazırlaşır.

Marja xəbər verir ki, şirkətin baş icraçı direktoru Rayan Makİnerninin əməkdaşlara göndərdiyi məlumatlandırma məktubunda ixtisarların ümumi işçi qüvvəsinin təxminən 7%-ni əhatə edəcəyi bildirilib. Qərarın əsasən texnologiya və məhsul komandalarına təsir göstərəcəyi qeyd olunub.

Ödəniş sektorunun aparıcı iştirakçılarından olan “Visa” qlobal rəqabətin güclənməsi və bazar dinamikasının dəyişməsi fonunda təşkilati strukturunu yenidən formalaşdırır.

Makİnerni şirkətdaxili məktubunda əsas məqsədin ümumi səmərəliliyi artırmaq və ən yüksək inkişaf potensialına malik istiqamətlərə yenidən sərmayə yatırmaq olduğunu vurğulayıb.

Son maliyyə ilinin yekununa əsasən, təxminən 34 min 100 əməkdaşı olan şirkətin işçi sayı son on ildə üç dəfədən çox artıb. Planlaşdırılan ixtisarlar nəticəsində “Visa” ümumi işçi qüvvəsinin təxminən 7%-i ilə yollarını ayıracaq.

Ödəniş texnologiyaları sahəsində “Visa” ilə rəqabət aparan “PayPal” və “Block” kimi maliyyə texnologiyaları nəhəngləri də son aylarda daha genişmiqyaslı ixtisar proqramları elan ediblər.

Süni intellekt inteqrasiyası və yeni investisiya istiqamətləri

Təşkilati dəyişikliklərin arxasında yalnız əmək xərclərinə qənaət etmək deyil, həm də iş proseslərinin transformasiyası dayanır.

Makİnerni süni intellekt texnologiyalarının “Visa” daxilində iş proseslərini sürətləndirdiyini, təkrarlanan tapşırıqların sayını azaltdığını və məhsulların hazırlanmasına töhfə verdiyini bildirib.

Şirkətə yaxın mənbələrin məlumatına görə, ixtisarlar nəticəsində qənaət ediləcək vəsait istehlakçı ödənişləri, kommersiya həlləri və əlavə dəyər yaradan xidmətlərin inkişafına yönəldiləcək.

Xüsusilə steyblkoinlər, transsərhəd ödənişlər və bizneslərarası (B2B) ödəniş həlləri kimi yüksək artım potensialına malik innovativ sahələr “Visa”nın yeni dövr üzrə əsas prioritetləri sırasında yer alır.

İxtisar qərarının şirkətin güclü maliyyə nəticələri göstərdiyi dövrə təsadüf etməsi diqqət çəkir.

Makİnerni son bir neçə ildə atılmış strateji addımlar sayəsində ticarət dünyasında yeni mərhələyə qədəm qoyduqlarını və biznes proseslərində real dinamika əldə etdiklərini qeyd edib.

Şirkət rəhbərliyi ixtisarlara baxmayaraq innovasiyaları sürətləndirməyi, yeni məhsulları əvvəlkindən daha tez bazara çıxarmağı və qlobal ödəniş infrastrukturu sahəsində lider mövqeyini möhkəmləndirməyi hədəfləyir.

İş elanları AzVak.az-da