“Citadel Securities” ABŞ Federal Ehtiyat Sisteminin (FED, ABŞ Mərkəzi Bankı) bu həftə gözlənilmədən faiz dərəcəsini artıra biləcəyini və belə bir addımın inflyasiya ilə mübarizədə qurumun etibarlılığını gücləndirəcəyini bildirib.

Marja xəbər verir ki, Şirkət Fed-in bu həftə faiz dərəcəsini artıracağını gözlədiyini açıqlayıb. “Citadel Securities”in qiymətləndirməsinə görə, belə bir sürpriz qərar FED-in sədri Kevin Uorşun inflyasiya ilə mübarizədə mövqeyinə olan etimadı artıracaq.

Şirkətin makrostrategiya rəhbəri Frenk Flayt yayımladığı qeyddə bildirib ki, çərşənbə günü faiz dərəcəsinin 25 baza bəndi artırılması Kevin Uorşun qiymət sabitliyini bərpa etmək öhdəliyini möhkəmləndirəcək. Bu addım, həmçinin pul siyasəti qərarlarının hər birinin əvvəlcədən bazara istiqamətləndirilməsinə artıq ehtiyac duyulmadığını göstərəcək.

“Bazar Fed-in daha sərt pul siyasətinə dönüşünün miqyasını yenidən lazımınca qiymətləndirməmiş ola bilər”, – Flayt qeyd edib.

Onun sözlərinə görə, bu həftə faiz dərəcəsinin artırılması “gələcək siyasətlə bağlı əvvəlcədən istiqamətləndirmə dövrünü qəti şəkildə başa çatdıracaq” və Fed-in müstəqilliyini ön plana çıxaracaq.

Faiz svopları çərşənbə günü 25 baza bəndlik artım ehtimalını təxminən 40% səviyyəsində qiymətləndirir. Bu göstərici son illərdə FED qərarları ərəfəsində müşahidə olunan vəziyyətlə müqayisədə qeyri-adi dərəcədə yüksək qeyri-müəyyənliyə işarə edir. İnvestorlar isə sentyabr ayında faiz artımını artıq tam şəkildə qiymətlərə daxil ediblər.

Flaytın fikrincə, FED-in bu həftə hərəkətə keçməsi sentyabr ayını gözləməsindən daha güclü təsir yaradacaq. Çünki belə bir qərar mərkəzi bankın inflyasiyaya necə reaksiya verəcəyi ilə bağlı gözləntiləri yenidən formalaşdıracaq.

O bildirib ki, sürpriz faiz artımı FED-in inflyasiya ilə mübarizədə etibarlılığını gücləndirməklə yanaşı, inflyasiya qalıcı xarakter almadan şirkətlərin qiymətqoyma qərarlarına və işçilərin əməkhaqqı tələblərinə təsir göstərə bilər. Bu isə gələcəkdə daha sərt monetar siyasət tədbirlərinə ehtiyacı azalda bilər.

Son dövrdə açıqlanan məşğulluq və inflyasiya göstəricilərindəki zəifləmənin iyul ayında faiz artımı gözləntilərini azaltdığını bildirən Flayt, bununla belə, inflyasiya risklərinin yüksək səviyyədə qaldığını və əmək bazarının güclü mövqeyini qoruduğunu göstərən məlumatların diqqətdən kənarda saxlanılmamalı olduğunu vurğulayıb.

Flayt son həftələrdə enerji qiymətlərinin yüksəlməsinin də FED-i bu həftə faiz dərəcəsini artırmağa sövq edə biləcək amillərdən biri olduğunu qeyd edib.

İş elanları AzVak.az-da