“Johnson & Johnson” bazar ertəsi ABŞ-də talk tərkibli məhsullar (pudralar) ilə əlaqədar qaldırılmış və hələ də davam edən yumurtalıq xərçəngi iddialarının böyük əksəriyyətinin həlli üçün ilkin razılaşma əldə etdiyini açıqlayıb.

Marja.az xəbər verir ki, şirkət iddiaçıların azı 95%-i razılaşmanı qəbul edəcəyi təqdirdə 5,5 milyard dollar ödəməyi öhdəsinə götürüb.

Səhiyyə sektorunda fəaliyyət göstərən şirkətin məlumatına görə, təklif olunan razılaşma federal səviyyədə çoxsaylı məhkəmə işlərinin birləşdirildiyi proses və əlaqəli ştat məhkəmələri çərçivəsində baxılan təxminən 76 min yumurtalıq xərçəngi iddiasını əhatə edəcək. “Johnson & Johnson” bunu 15 ildən artıq davam edən məhkəmə çəkişmələrinin səmərəli şəkildə yekunlaşdırılması kimi qiymətləndirib.

Razılaşma federal məhkəmənin bu yaxınlarda qəbul etdiyi qərardan sonra əldə olunub. Həmin qərarda iddiaçıların şirkətin talk məhsullarının konkret şəxslərdə yumurtalıq xərçənginə səbəb olduğunu sübut edə bilib-bilməyəcəyi sual altına alınıb.

Hər gün yeni vakansiyalar - AzVak.az-da

“Johnson & Johnson” bildirib ki, məhkəmə qalan iddiaların niyə rədd edilməməli olduğunun əsaslandırılmasını tələb etməzdən əvvəl iddiaçılar sınaq xarakterli iki iş üzrə konkret səbəb-nəticə əlaqəsini araşdıran ekspertlərini prosesdən geri çəkiblər.

Razılaşmanın şərtlərinə əsasən, məbləği 3 milyard dollardan çox olmayacaq ilk ödəniş 2027-ci ildə həyata keçiriləcək. Növbəti ödənişlər isə 2028-ci ildən əvvəl edilməyəcək.

Şirkət məhkəmədə qalib gələcəyinə inanırdı – niyə 5,5 milyard dollar ödəyir?

“Johnson & Johnson” məhkəmə prosesində qalib gələcəyinə əmin olduğunu, lakin uzunmüddətli məhkəmə çəkişmələrinin yaratdığı xərcləri və qeyri-müəyyənliyi aradan qaldırmaq üçün razılaşmaya üstünlük verdiyini açıqlayıb.

Şirkət onilliklər ərzində aparılmış elmi tədqiqatların kosmetik talkın təhlükəsizliyini təsdiqlədiyini, talk məhsullarının tərkibində asbest olmadığını və onların xərçəngə səbəb olmadığını bildirməkdə davam edir.

Talk — maqnezium, silisium və oksigendən ibarət təbii, çox yumşaq mineral maddədir. Nəmi udmaq, sürtünməni azaltmaq və məhsula hamar tekstura vermək xüsusiyyətinə malikdir.

Talkdan əsasən uşaq pudrası, bədən pudrası, kosmetika, dərman və sənaye məhsullarının hazırlanmasında istifadə olunur.

İş elanları AzVak.az-da