“PAŞA Sığorta” ASC bu ilin 1-ci yarısının (yanvar-iyun) yekunları ilə bağlı maliyyə göstəricilərini açıqlayıb. Şirkət yanvar-iyun aylarında 14,55 milyon manat xalis mənfəət əldə edib.

Gəlirləri 25%-dən çox artıb

Şirkətin yaydığı press-relizdə bildirilir ki, 6 ay ərzində “PAŞA Sığorta”nın gəlirləri ötən ilin eyni dövrünə nisbətən 25,2% çox – 191,8 milyon manat təşkil edib. O cümlədən şirkət əsas əməliyyat gəlirlərini 14,8% artıraraq 210 milyon manata, investisiya gəlirlərini 61,3% artıraraq 13,7 milyon manata, digər gəlirlərini isə 32,35% artıraraq 1,6 milyon manata çatdırıb və xalis sığorta ehtiyatlarının dəyişməsindən yaranmış 33,4 milyon manat zərəri artıqlaması ilə kompensasiya edib.

Şirkətdə müştəriyönümlülük qorunmaqdadır

“PAŞA Sığorta” I yarımildə 209,1 milyon manat sığorta haqqı toplayıb, 81,75 milyon manat sığorta ödənişi edib. Bunlar, illik müqayisədə müvafiq olaraq 14,7% və 25,9% çoxdur. Göründüyü kimi, şirkətin ödənişlərinin artım tempi yığımlarının artım tempini hələ də üstələyir, bu isə onun fəaliyyətində müştəriyönümlülüyün qorunmasından xəbər verir.

İnvestisiya portfelinin dəyəri 272 milyon manatı keçib

Son 1 ildə “PAŞA Sığorta”nın investisiya portfeli 17,5% artım nümayiş etdirərək bu il iyunun 30-na 272,3 milyon manat təşkil edib. Portfelin təxminən yarısı və yaxud 146 milyon manatı depozitlərdir. İl ərzində şirkətin banklarda yerləşdirdiyi vəsaitlərin məbləği 2,3 dəfə artıb. Depozitlərin yarım illik gəlirliliyi isə 2,5 dəfə artımla 6,4 milyon manata yüksəlib.

Hesabat tarixinə sığortaçı həmçinin 101,2 milyon manat dəyərində istiqrazlara, cümlədən 95,2 milyon manatlıq dövlət və 6 milyon manatlıq qeyri-dövlət istiqrazlarına malik olub. Onun digər investisiyalarının dəyəri isə 2,9% artımla 25,1 milyon manat təşkil edib. Yeri gəlmişkən, onun digər investisiyalarının 6 aylıq gəlirliliyi 11,2 dəfə artımla 3,6 milyon manata çatıb.

Aktivləri yarım milyard manata yaxındır

2026-cı il iyunun sonuna “PAŞA Sığorta” 468,8 milyon manatlıq aktivlərə malik olub. Bu 1 il əvvələ nisbətən 28,8% çoxdur. O cümlədən, şirkət aktivlər üzrə 93,2 milyon manat sığorta ehtiyatlarına malikdir ki, bu da 2025-ci il cari dövrü ilə müqayisədə 2,55 dəfə artım deməkdir.

Hesabat dövründə “PAŞA Sığorta”nın öhdəlikləri 38% artımla bu il iyunun 30-na 370,1 milyon manata yüksəlib. Şirkətin öhdəliklər üzrə sığorta ehtiyatları isə illik müqayisədə 37,1% çox – 310,7 milyon manat olub.

Sığortaçının balans kapitalı 98,7 milyon manat (3,1% çox), o cümlədən nizamnamə kapitalı 50 milyon manat (dəyişməyib) təşkil edib. Halbuki, Azərbaycan Mərkəzi Bankının müəyyən etdiyi “Sığortaçının tələb olunan kapitalının minimum məbləği” 5 milyon manatdır. Bu isə “PAŞA Sığorta”nın kifayət qədər yüksək kapitallaşdığından, müştəriləri qarşısında öhdəliklərini yerinə yetirə bilməmək riskinin olmamasından xəbər verir.

İş elanları AzVak.az-da