Cümə axşamı əsas faiz dərəcəsini dəyişmədən saxlayan Avropa Mərkəzi Bankı (AMB) iqtisadi və geosiyasi proseslərin inkişafından asılı olaraq sentyabrda faiz artımına gedə bilər.

Marja xəbər verir ki, məsələyə yaxın mənbələrin məlumatına görə, AMB rəsmiləri Avrozonada inflyasiya perspektivində nəzərəçarpacaq yaxşılaşma baş verməyəcəyi təqdirdə sentyabrda borclanma xərclərini artırmağa hazırlaşırlar.

Mənbələr bildiriblər ki, xüsusilə Yaxın Şərqdəki münaqişələr və onların iqtisadi təsirləri ilə bağlı mövcud məlumatlar fonunda istehlak qiymətlərinə təzyiqi nəzarətdə saxlamaq üçün əsas faiz dərəcəsinin daha 25 baza bəndi artırılması daha real görünür.

Bununla belə, hələlik yekun qərarın qəbul edilmədiyi vurğulanıb. Mənbələrin sözlərinə görə, sülh sazişi istiqamətində irəliləyiş əldə olunacağı və ya iqtisadiyyatda gözləniləndən daha kəskin zəifləmə baş verəcəyi halda mövcud proqnoz sürətlə dəyişə bilər.

Bu yanaşma AMB-nin qərarları “iclasdan-iclasa” qəbul etmək strategiyasına uyğundur.

Laqard faiz artımına işarə edib

AMB-nin prezidenti Kristin Laqard cümə axşamı bildirib ki, İdarəetmə Şurasının bəzi üzvləri depozit faizinin 2,25% səviyyəsində saxlanılması barədə qərardan əvvəl faiz artımı variantını nəzərdən keçiriblər. Bu açıqlama sentyabrda mümkün faiz artımına işarə kimi qiymətləndirilib.

“Bəzi üzvlər faiz artımını nəzərdən keçirməli olub-olmadığımızı gündəmə gətirdilər. Mövcud şəraitdə gözləməyin, qarşıdakı bir neçə həftə ərzində həm prosesləri, həm də yeni məlumatları yaxından izləməyin düzgün yanaşma olduğuna qərar verdik”, – Laqard Frankfurtda keçirdiyi mətbuat konfransında bildirib.

AMB inflyasiya risklərinin artdığını bildirir

Avropa Mərkəzi Bankı münaqişələrin başlamasından sonra ötən ay faiz dərəcəsini artıran ilk “Böyük Yeddilik” (G7) mərkəzi bankı olmuşdu. Bank münaqişələrin yaratdığı qiymət təzyiqlərinə qarşı mübarizədə G7 ölkələrinin mərkəzi bankları arasında ön mövqeyini qoruyur.

“İnflyasiya perspektivi ilə bağlı risklər yuxarı istiqamətlidir”, – Kristin Laqard mətbuat konfransında deyib.