İranın xarici işlər naziri Abbas Əraqçi bildirib ki, ABŞ-ın İrana qarşı mümkün hücumlarına hər hansı formada dəstək verən tərəflər, göstərilən dəstəyin növündən asılı olmayaraq, legitim hədəf hesab ediləcək.

Marja xəbər verir ki, Əraqçi ABŞ-ın İrana qarşı təhdidlərindən sonra sosial şəbəkə hesabında açıqlama yayıb.

“Müdafiə doktrinamız aydındır: gözə göz, dişə diş”, – deyə iranlı nazir paylaşımında bildirib.

“İrana qarşı istənilən təcavüz, o cümlədən infrastrukturumuza hücum, bizi güclü və qətiyyətli cavab verməyə vadar edəcək”, – Əraqçi xəbərdarlıq edib.

Əraqçi ABŞ-ın mümkün hücumlarını şərh edərkən bildirib: “Belə bir təcavüzə töhfə verənlər, göstərdikləri dəstəyin növündən asılı olmayaraq, legitim hədəf hesab ediləcəklər”.

“ABŞ-ın regiondakı müttəfiqlərinin elektrik enerjisi kəsiləcək”

İran İslam İnqilabı Keşikçiləri Korpusu ABŞ Prezidenti Donald Trampın Tehran ətrafındakı körpüləri və elektrik stansiyalarını hədəfə ala biləcəklərinə dair təhdidinə cavab verib.

“Əgər körpülərimizə və ya elektrik stansiyalarımıza hücum edilərsə, ABŞ-ın regiondakı müttəfiqlərinin elektrik enerjisi kəsiləcək”, – deyə bəyanatda xəbərdarlıq edilib.

İslam İnqilabı Keşikçiləri Korpusunun Aerokosmik Qüvvələrinin komandanı, briqada generalı Məcid Musəvi ABŞ Prezidenti Donald Trampın İran infrastrukturunun hədəfə alınması ilə bağlı açıqlamalarını şərh edib.

Musəvi məsələ ilə əlaqədar yaydığı bəyanatda bildirib: “Əgər körpülərimizə və ya elektrik stansiyalarımıza hücum edilərsə, ABŞ-ın regiondakı müttəfiqlərinin elektrik enerjisi kəsiləcək”.

ABŞ Prezidenti Donald Tramp daha əvvəl verdiyi açıqlamada demişdir:

“Bundan sonra İran İslam Respublikası Hörmüz Boğazında hər hansı gəmiyə raket, reaktiv mərmi, pilotsuz uçuş aparatı və ya başqa bir vasitə və silahla atəş açdığı hər dəfə ABŞ, paytaxt Tehranın daxilində və ya ətrafında yerləşənlər də daxil olmaqla, bir körpünü və ya elektrik stansiyasını bombalayaraq məhv edəcək”.