Airbus çərşənbə axşamı Londonda investorlar üçün keçirdiyi təqdimatda 2029-cu ildə 12–13 milyard avro (13,7–14,8 milyard dollar) həcmində illik əməliyyat mənfəəti əldə etməyi hədəflədiyini açıqlayıb. Şirkət, həmçinin qarşıdakı üç il ərzində 5 milyard avroluq səhmlərin geri alınması proqramına başlayacağını bildirib.

Marja xəbər verir ki, Şirkət bəzi mühərriklərdə yaranan problemlər və ehtiyat hissələrinin çatışmazlığı da daxil olmaqla, istehsalı uzun müddət ləngidən çətinlikləri tədricən aradan qaldırır.

Airbus-un baş icraçı direktoru Guillaume Faury Londonda keçirilən görüşdə investorlara bildirib:

“Təchizat imkanlarımızla bağlı bir çox mühüm hədəfə nail olmuşuq. Fəaliyyət göstərdiyimiz bazarlar güclüdür”.

Airbus-un açıqlamasına görə, mənfəətə ən böyük töhfə şirkətin mülki aviasiya bölməsindən gələcək. Bu bölmənin əməliyyat mənfəətinin ötənilki 5,5 milyard avrodan 2029-cu ilədək təxminən 10 milyard avroya yüksələcəyi gözlənilir.

Şirkət "Airbus Defence and Space" bölməsinin 1,3 milyard avro, helikopter bölməsinin isə təxminən 1,2 milyard avro mənfəət təmin edəcəyini proqnozlaşdırır.

Potensial sövdələşmələr

Airbus genişgövdəli təyyarələr bazarında payını artırmağı hədəflədiyini açıqlayıb. Şirkət 2029-cu ildə A330 modelinin aylıq istehsalını 5 ədədə, 2028-ci ildə isə A350 modelinin aylıq istehsalını 12 ədədə çatdırmağı planlaşdırır.

Tələbatın yüksək olduğu A320 ailəsinə daxil modellərin aylıq istehsalının 2027-ci ildə 70–75 ədədə, daha kiçik A220 modelinin istehsalının isə 2028-ci ildə 13 ədədə çatdırılması nəzərdə tutulur.

Airbus-un kommersiya əməliyyatları üzrə yeni rəhbəri Lars Wagner bildirib ki, şirkət genişgövdəli təyyarələrin istehsal tempini daha da artırmaq imkanlarını araşdırır. Onun sözlərinə görə, A350 modelinin aylıq istehsalı 2028-ci il üçün nəzərdə tutulan 12 ədədlik hədəfi “əhəmiyyətli dərəcədə üstələyə bilər”.

Wagner, həmçinin Airbus-un daha yüksək gəlir və satış hədəflərinə nail olmaq üçün “əhəmiyyətli” sövdələşmələr imzalamağa hazır olduğunu qeyd edib.

İyulun 29-da maliyyə nəticələrini açıqlayacaq Airbus cari il üçün qısamüddətli hədəflərini də qüvvədə saxlayıb. Şirkət 2026-cı il ərzində təxminən 870 təyyarə təhvil verməyi, 7,5 milyard avro əməliyyat mənfəəti və təxminən 4,5 milyard avro sərbəst pul axını əldə etməyi planlaşdırır.

İş elanları AzVak.az-da