ABŞ administrasiyası Kanadanın Amerika məhsullarına qarşı “ayrı-seçkilik xarakterli” tədbirlər həyata keçirdiyini əsas gətirərək, bu ölkədən idxal olunan bəzi mallara 50 faiz gömrük rüsumu tətbiq ediləcəyini açıqlayıb.

Marja.az-ın məlumatına görə, Ağ Evin yaydığı açıqlamada bildirilib ki, ABŞ Prezidenti Donald Tramp Kanadanın ABŞ ticarətinə münasibətdə “ayrı-seçkilik xarakterli” tədbirlərinə cavab olaraq, 1930-cu il Tarif Qanununun 338-ci bölməsinə əsasən, Kanada mənşəli müəyyən məhsullara 50 faiz əlavə gömrük rüsumunun tətbiqini nəzərdə tutan üç ayrı prezident bəyannaməsi imzalayıb.

Açıqlamaya görə, bu addım Kanadanın ABŞ ticarətinə qarşı “ayrı-seçkilik münasibəti” nəticəsində yaranan yük və mənfi təsirləri tarazlaşdırmaq, eləcə də avtomobillər, spirtli içkilər və süd məhsulları kimi ABŞ-ın mühüm ixrac malları üçün bərabər rəqabət şəraiti yaratmaq məqsədi daşıyır.

Bildirilib ki, hər bir bəyannamə Kanadadan idxal edilən müxtəlif məhsul qruplarına 50 faiz əlavə gömrük rüsumu tətbiq edir. Bu məhsullar arasında şərabdan xokkey çubuqlarına və sementə qədər müxtəlif mallar yer alır.

Açıqlamada vurğulanıb ki, yeni tarif məhsulun ABŞ–Meksika–Kanada Sazişi (USMCA) çərçivəsinə daxil olub-olmamasından asılı olmayaraq, müvafiq malların hamısına şamil ediləcək.

Enerji məhsulları, kalium duzları, 232-ci bölmə çərçivəsində tarif tətbiq edilən mallar, eləcə də balıq və kritik minerallar kimi bəzi məhsullar isə yeni tarifdən azad olunacaq.

Yeni tarif avqustun 19-da qüvvəyə minəcək

Ağ Evin açıqlamasında qeyd olunub ki, yeni tarif prezident bəyannamələrinin imzalanmasından 30 gün sonra – avqustun 19-da qüvvəyə minəcək.

Tarifin tətbiq edilməsinin səbəblərinə toxunulan açıqlamada bildirilib ki, Kanada ABŞ-dan idxal olunan avtomobillərə müəyyən tariflər və kvotalar tətbiq etdiyi halda, digər ölkələrdən idxal edilən avtomobillərə qarşı eyni tədbirlərdən istifadə etmir.

Məlumata görə, 2025-ci ilin aprelindən 2026-cı ilin martınadək Kanadanın ABŞ-dan motorlu nəqliyyat vasitələri idxalı əvvəlki ilin müvafiq dövrü ilə müqayisədə təxminən 22 faiz azalıb.

Açıqlamada Kanadanın əksər əyalət və ərazilərində ABŞ mənşəli spirtli içkilərin alınmasının, paylanmasının və ya pərakəndə satışının dayandırıldığına diqqət çəkilib. Bunun nəticəsində 2025-ci ilin martından 2026-cı ilin fevralınadək Kanadanın ABŞ-dan spirtli içki idxalı illik müqayisədə təxminən 81 faiz azalıb.

Kanadanın “mürəkkəb və proteksionist” kimi qiymətləndirilən süd məhsulları sistemi də yeni tariflərin tətbiq edilməsinin səbəbləri sırasında göstərilib.

İş elanları AzVak.az-da