Qlobal internet televiziya platforması Netflix 2026-cı ilin ikinci rübü üzrə maliyyə nəticələrini açıqlayıb.

Marja xəbər verir ki, şirkətin gəlirləri bu ilin ikinci rübündə ötən ilin eyni dövrü ilə müqayisədə 13,4% artaraq 12,6 milyard dollara çatıb. Netflix-in gəlirləri 2025-ci ilin ikinci rübündə 11,1 milyard dollar təşkil etmişdi.

Şirkət gəlirlərdəki artımın abunəçi sayının çoxalması, qiymət siyasəti və reklam gəlirlərinin yüksəlməsi ilə bağlı olduğunu bildirib.

Netflix üçüncü rübdə gəlirlərinin 12,9 milyard dollara çatacağını proqnozlaşdırır. Şirkət 2026-cı il üzrə gəlir proqnozu diapazonunu daraldaraq illik gəlirlərinin 51–51,4 milyard dollar arasında olacağını açıqlayıb.

Netflix-in xalis mənfəəti də ilin ikinci rübündə ötən ilin müvafiq dövrü ilə müqayisədə təxminən 8,8% artaraq 3,4 milyard dollara yüksəlib. Şirkət 2025-ci ilin eyni dövründə 3,1 milyard dollar xalis mənfəət əldə etmişdi.

Netflix-in ötən ilin ikinci rübündə 72 sent olan səhm üzrə mənfəəti bu dövrdə 80 sentə çatıb.

Şirkətin ildə iki dəfə açıqladığı “Nə izlədik?” (“What We Watched”) hesabatına əsasən, Netflix abunəçiləri 2026-cı ilin ilk yarısında 97 milyard saatdan çox kontent izləyiblər. Bu göstərici ötən ilin eyni dövrü ilə müqayisədə 2% çoxdur.

Netflix-in açıqlamasında bildirilib ki, “Nə izlədik?” hesabatı 2027-ci ildən başlayaraq ildə bir dəfə, hər ilin birinci rübündə dərc olunacaq.

“Hesabatın dərc edilməsi prosesini maliyyə nəticələrimizdən ayırmaqda məqsəd diqqəti əsas maliyyə göstəricilərimiz olan gəlirlər və əməliyyat mənfəəti üzərində saxlamaqdır”, – şirkətin açıqlamasında qeyd edilib.

Təxminən 300 layihədə süni intellektdən istifadə olunub

2026-cı ildə generativ süni intellektdən Netflix-in təxminən 300 layihəsində istifadə edildiyi bildirilib. Bu texnologiyanın ən geniş tətbiq olunduğu sahə postprodakşn mərhələsi olub.

Şirkət ənənəvi üsullarla müqayisədə daha sürətli, daha az xərcli və daha yüksək keyfiyyətli nəticələr əldə etmək üçün bu vasitələrdən getdikcə daha çox yararlanıldığını qeyd edib. Bildirilib ki, generativ süni intellekt texnologiyası olmasaydı, bəzi hallarda layihələrdən mühüm çəkilişlərin və səhnələrin çıxarılması zərurəti yarana bilərdi.

İş elanları AzVak.az-da