“Polygraf AI” şirkətinin həmtəsisçisi Yaqub Rəhimov Azərbaycanda “Polygraf Labs” mərkəzinin yaradılmasının planlaşdırıldığını açıqlayıb.

Marja.az xəbər verir ki, təşəbbüsün əsas məqsədi ölkədə süni intellekt və kibertəhlükəsizlik ekosisteminin inkişafına dəstək verməkdir.

Məlumata görə, yeni mərkəzin fəaliyyəti çərçivəsində Azərbaycanda 200 yeni iş yerinin yaradılması nəzərdə tutulur. “Polygraf Labs”ın Yaxın Şərq və Mərkəzi Asiya ölkələrinə xidmət göstərən regional texnologiya qovşağına çevrilməsi planlaşdırılır.

Yaqub Rəhimov bildirib ki, “University Demo Day” tədbirində iştirak edən tələbələrdən bəzilərini gələcəkdə “Polygraf AI” komandasının üzvü kimi görməkdən məmnun olardı.

Şirkət, həmçinin regionda təhlükəsiz və suveren süni intellekt təşəbbüslərinin inkişafını dəstəkləmək məqsədilə 6-cı “University Demo Day” müsabiqəsində ilk üç yeri tutan komandalara ümumilikdə 5 min ABŞ dolları dəyərində “Polygraf AI” kreditləri təqdim edib.

“University Demo Day”in qalibləri açıqlanıb

Müsabiqənin qalibi ADA Universitetini təmsil edən “QuickRecap” komandası olub. Komandanın hər bir üzvü “Code Academy”də istənilən karyera proqramı üzrə 100 faiz təhsil təqaüdü qazanıb.

İkinci yeri ADA Universitetinin “Seeder” komandası tutub. Komanda üzvlərinin hər biri “Code Academy”nin “AI for Everyone” proqramı üzrə 100 faiz təhsil təqaüdü əldə edib.

Üçüncü yerə isə Azərbaycan Texniki Universitetinin “StipUp” komandası layiq görülüb. Bu komandanın üzvlərinə də “AI for Everyone” proqramı üzrə tam təhsil təqaüdü təqdim olunub.

“Seeder”ə 10 min dollarlıq investisiya təklifi

Tədbir çərçivəsində “Caucasus Ventures” vençur kapitalı fondunun nümayəndəsi Samir Hacıbəyli “Seeder” startapını xüsusi olaraq fərqləndirib. Startapa 10 min ABŞ dolları məbləğində şərti investisiya öhdəliyi təqdim edilib. Bundan əlavə, komandanın bir nümayəndəsi oktyabr ayında təşkil olunacaq Silikon Vadisi səfərinə dəvət olunub.

Təşəbbüslərin Azərbaycanda tələbə startaplarının inkişafına, süni intellekt üzrə yeni layihələrin formalaşmasına və texnologiya sahəsində məşğulluğun artırılmasına töhfə verəcəyi gözlənilir.

“Baku ID”, “SABAH.HUB” İnnovasiya Mərkəzi tərəfindən təşkil olunan, startaplara və investisiyalara yönəlmiş, Azərbaycanın aparıcı innovasiya tədbirlərindən biridir.  "Baku ID" çərçivəsində  "University Demo Day" tədbiri keçirilir.