“PepsiCo” cümə axşamı açıqladığı rüblük hesabatda qarışıq nəticələr nümayiş etdirib. Marja xəbər verir ki, Şirkətin Şimali Amerikadakı qida və içki bölmələrinin zəif göstəriciləri beynəlxalq bazarlardakı güclü tələbin müsbət təsirini neytrallaşdırıb.

“ABŞ-də inflyasiya təzyiqlərinin artması fonunda istehlakçı büdcələrinin məhdudlaşması qida və içki kateqoriyalarındakı göstəriciləri zəiflədib və bu da rübün nəticələrinə təsir göstərib”, – deyə “PepsiCo”nun baş icraçı direktoru Ramon Laquarta şirkətin saytında yayımlanan açıqlamasında bildirib.

İkinci rübü ərzində ABŞ ilə İran arasındakı müharibə səbəbindən qlobal neft qiymətləri kəskin dəyişib. ABŞ-də benzinin orta qiyməti mayın sonunda bir qallon üçün 4,56 dollara çataraq son dörd ilin ən yüksək səviyyəsinə yüksəlib. Bu isə bir çox istehlakçını xərclərinə daha diqqətlə yanaşmağa vadar edib.

Səhər ticarəti zamanı “PepsiCo”nun səhmləri 4 faizdən çox ucuzlaşıb.

LSEG tərəfindən analitiklər arasında keçirilmiş sorğuya əsasən, iyunun 13-də başa çatan rüb üzrə şirkətin nəticələri və “Wall Street”in gözləntiləri belə olub:

Bir səhmə mənfəət: 2,20 dollar – gözlənti 2,21 dollar

Gəlir: 24,18 milyard dollar – gözlənti 23,95 milyard dollar

“PepsiCo” ikinci rübdə şirkətin payına düşən 2,98 milyard dollar xalis mənfəət əldə edib. Bu, bir səhm üçün 2,18 dollara bərabərdir. Ötən ilin eyni dövründə xalis mənfəət 1,26 milyard dollar, yaxud bir səhm üçün 92 sent təşkil etmişdi.

Restrukturizasiya, aktivlərin dəyərsizləşməsi və digər birdəfəlik xərclər nəzərə alınmadıqda, şirkətin bir səhmə mənfəəti 2,20 dollar olub.

Xalis satışlar 6,4 faiz artaraq 24,18 milyard dollara çatıb. Satınalmalar, aktiv satışları və valyuta məzənnələrinin təsiri nəzərə alınmadan hesablanan orqanik gəlir isə rüb ərzində 2,4 faiz yüksəlib.

Qlobal miqyasda “PepsiCo”nun qida məhsulları üzrə satış həcmi 3 faiz, içkilər üzrə isə 2 faiz artıb. Tələbi daha dəqiq əks etdirmək üçün bu göstəricidə qiymət dəyişiklikləri və valyuta məzənnələrinin təsiri nəzərə alınmır.

Lakin satış həcmlərindəki artım əsasən beynəlxalq bazarlardan qaynaqlanıb. ABŞ-də tələb xeyli zəif olub. Şirkətin Şimali Amerikadakı qida biznesinin satış həcmi dəyişməyib, içki bölməsinin satış həcmi isə 4 faiz azalıb.

“Düşünürəm ki, istehlakçıların vəziyyəti gözlədiyimizdən daha zəifdir və bunun əsas səbəbi benzin qiymətləridir”, – deyə Laquarta şirkətin maliyyə nəticələrinə həsr olunmuş konfrans zəngində bildirib.

Tələb xüsusilə gündəlik tələbat mağazalarında zəif olub.

“Gündəlik tələbat mağazaları və yanacaqdoldurma məntəqələri kanalında müəyyən yaxşılaşma görməliyik. Ümid edirik ki, benzin qiymətləri bu istiqamətdə bizə müsbət təsir göstərəcək”, – deyə maliyyə direktoru Stiv Şmitt bildirib.

Son iki il ərzində qiymətlərin yüksəlməsi nəticəsində şirkətin Şimali Amerikadakı hər iki seqmentində tələb zəifləyib. “PepsiCo” fevral ayında alıcıları geri qaytarmaq məqsədilə “Lay’s”, “Tostitos”, “Doritos” və “Cheetos” məhsullarının qiymətlərini 15 faizədək endirib. Şirkət, həmçinin satışları artırmaq üçün “Gatorade” və “Lay’s” kimi tanınmış brendlərini yeni dizayn və brend yanaşması ilə yeniləyir.

“PepsiCo” Şimali Amerikadakı satış həcmlərinin bərpa olunacağını gözləyir. Lakin xüsusilə bu rübdəki geriləmədən sonra bunun müəyyən vaxt aparacağı bildirilir.

“Şimali Amerikadakı biznesimizin ikinci rübdəki göstəriciləri gözlədiyimizdən zəif oldu. İndi ilin qalan hissəsində nəticələrin daha tədricən yaxşılaşacağını gözləyirik”, – deyə Şmitt əvvəlcədən hazırlanmış açıqlamasında bildirib.

“PepsiCo” il üzrə əvvəlki proqnozunu dəyişməyib. Şirkət orqanik gəlirin 2–4 faiz, sabit valyuta məzənnələri əsasında əsas bir səhmə mənfəətin isə 4–6 faiz artacağını gözləyir.