Rusiya daxili bazarda yanacaq təklifini artırmaq məqsədilə dizel yanacağının ixracına qadağa qoyub. Qərarın artan tələbi və təklif çatışmazlığını yumşaltmağa xidmət edəcəyi gözlənilir.

Marja xəbər verir ki, Rusiya Baş nazirinin müavini Aleksandr Novak daxili bazarda yanacaq təklifini artırmaq məqsədilə dizel yanacağının ixracına qadağa tətbiq edildiyini açıqlayıb.

Novak Rusiya Prezidenti Vladimir Putinin hökumət üzvləri ilə keçirdiyi iclasda yanacaq bazarındakı vəziyyəti qiymətləndirib.

O bildirib ki, Rusiyada yanacağa tələbat ötən ilin eyni dövrü ilə müqayisədə təxminən 30 faiz artıb. Novakın sözlərinə görə, bu vəziyyət yanacaqdoldurma məntəqələrinin üzərinə düşən yükü artırıb, avtomobillərin sayının və yanacaq doldurma müddətlərinin artmasına səbəb olub.

Daxili bazarda vəziyyətin hələ də çətin olaraq qaldığını bildirən Novak qeyd edib ki, yanacaq istehsalı həcmlərində məcburi azalma səbəbindən son istehlakçılara çatdırılma marşrutları da dəyişib.

“Bu gün dizel yanacağının ixracına qadağa tətbiq etdik və bu, daxili bazara təklifi artırmağa imkan verəcək”, – Novak bildirib.

Bazarda vəziyyəti sabitləşdirmək üçün neft emalı zavodlarında güc istifadəsinin maksimum səviyyəyə çatdırıldığını deyən Novak ehtiyatlardakı yanacağın bazara yönləndirildiyini, mövcud təmir müddətlərinin qısaldıldığını və bəzi neft emalı zavodlarında planlaşdırılan təmir işlərinin daha sonrakı tarixlərə təxirə salındığını qeyd edib.

Hökumət satış və ixrac məhdudiyyətlərinə əl atır

Ukraynanın pilotsuz uçuş aparatları ilə Rusiyadakı neft emalı zavodlarına təşkil etdiyi hücumlar səbəbindən ölkədə çoxsaylı müəssisələr təmirə dayandırılıb. Rusiya hökuməti isə yanacaq bazarında sabitliyi təmin etmək üçün vaxtaşırı satış və ixrac məhdudiyyətləri tətbiq edir.

Ölkədə Moskva və Sankt-Peterburq da daxil olmaqla, təxminən 40 regionda yanacaq satışına məhdudiyyətlər tətbiq olunur.