“Rabitəbank” ASC-də yeni kadr təyinatı həyata keçirilib. Bankın İdarə Heyətinin qərarı ilə Şəmi Əliyev Marketinq departamentinin rəhbəri vəzifəsinə təyin olunub.

Şəmi Əliyev ali təhsilini Azərbaycan Dövlət İqtisad Universitetinin “İqtisadiyyatın hüquqi tənzimlənməsi” fakültəsində başa vurub. Daha sonra ABŞ-ın nüfuzlu Texas A&M University-də “Biznesin idarəedilməsi” (MBA) üzrə magistr təhsili alaraq strateji idarəetmə, marketinq, maliyyə və biznesin inkişafı istiqamətlərində beynəlxalq bilik və təcrübə qazanıb.

Bank və maliyyə sektorunda 16 ilə yaxın peşəkar təcrübəyə malik olan Şəmi Əliyev əmək fəaliyyətinə 2010-cu ildə ABŞ-da başlayıb. 2010–2012-ci illərdə “JPMorgan Chase” və “IBC Bank”-da müxtəlif vəzifələrdə çalışıb. 2012-ci ildən etibarən Azərbaycanda bank sektorunda müştəri təcrübəsi, xidmət keyfiyyətinin ölçülməsi və idarə olunması, pərakəndə bankçılıq, satış şəbəkəsinin idarə edilməsi və biznesin inkişafı istiqamətlərində müxtəlif rəhbər vəzifələrdə fəaliyyət göstərib. Bu müddət ərzində müştəriyönümlü yanaşmaların inkişafı, xidmət standartlarının təkmilləşdirilməsi, əməliyyat proseslərinin optimallaşdırılması və keyfiyyət idarəetmə sistemlərinin qurulması üzrə çoxsaylı layihələrin həyata keçirilməsində iştirak edib.

2021-ci ilin may ayından etibarən Rabitəbank” ASC-də Xidmət keyfiyyətinə nəzarət departamentinin rəhbəri vəzifəsində çalışan Şəmi Əliyev bu müddət ərzində bankda müştəri məmnuniyyətinin artırılması, xidmət keyfiyyətinin yüksəldilməsi, daxili proseslərin təkmilləşdirilməsi və xidmət standartlarının inkişafı istiqamətində həyata keçirilən strateji təşəbbüslərə rəhbərlik edib.

Yeni vəzifəsində Şəmi Əliyev Rabitəbankın marketinq strategiyasının daha da gücləndirilməsi, brend dəyərinin artırılması, müştəriyönümlü marketinq həllərinin inkişafı, rəqəmsal marketinq imkanlarının genişləndirilməsi və bankın bazardakı mövqeyinin daha da möhkəmləndirilməsi istiqamətində fəaliyyət göstərəcək.

Bu təyinat Rabitəbankın müştəriyönümlü yanaşmasının daha da gücləndirilməsi, innovativ marketinq həllərinin tətbiqi və dayanıqlı inkişaf strategiyasının həyata keçirilməsi istiqamətində atılan növbəti mühüm addımlardan biridir.

 Məlumat üçün bildirək ki, “Rabitəbank” ASC 1993-cü ildən etibarən fəaliyyət göstərir və “Rahat bankçılıq” konsepsiyası əsasında müştərilərinə müasir və əlçatan maliyyə xidmətləri təqdim edir. Bankın nizamnamə kapitalı 101,3 milyon manatdır. Ölkə üzrə geniş filial şəbəkəsi, rəqəmsal bankçılıq həlləri və peşəkar komandası ilə Rabitəbank müştərilərinə dəyər yaradan xidmətlər təqdim etməyə davam edir. Bankın əsas səhmdarları “Azərbaycan Banklar Assosiasiyası”nın prezidenti Nuriyev Zakir Əlibala oğlu və iş adamı, sahibkar Əliyev Rauf Zeynal oğludur.

Hal-hazırda “Rabitəbank” ASC 19 region və Bakı şəhəri üzrə ümumilikdə 31 xidmət məntəqəsi, 78 ATM-i, “Rabita Mobile”, “Rabita Junior” və “Rabita Business” tətbiqləri, İnternet Bankçılıq platforması və 133 nömrəli Çağrı Mərkəzi ilə öz müştərilərinə ən müasir standartlar səviyyəsində geniş spektrli bank xidmətləri təqdim edir.