Microsoft şirkəti 6 min 400 nəfər işçisini ixtisar edəcək. 

Marja xəbər verir ki, Şirkətin Xbox bölməsi isə yenidən strukturlaşma çərçivəsində növbəti il ərzində 3 min 200 nəfəri işdən çıxarmağı planlaşdırır. İxtisar bölmə əməkdaşlarının təxminən 20 faizini əhatə edəcək. Bundan əlavə, Xbox dörd videooyun hazırlama studiyasını da satacaq və ya fəaliyyətindən çıxaracaq.

Xbox-un baş icraçı direktoru Asha Sharma əməkdaşlara göndərdiyi qeyddə “Hazırda biznesimizin vəziyyəti yaxşı deyil”, - deyə bildirib. Sharma Xbox-un oxşar bizneslərlə müqayisədə 3-10 dəfə daha aşağı mənfəət marjaları ilə fəaliyyət göstərdiyini qeyd edərək, “Xbox-u yenidən qurmalıyıq”, - ifadəsini işlədib.

Sharma yazıb ki, əsas məqsəd biznesi daha səmərəli hala gətirmək və daha böyük layihələrə yenidən investisiya yönəltməkdir.

Qeydə əsasən, bu gün Xbox-da 1600 nəfər işdən çıxarılacaq, qalan ixtisarlar isə növbəti 12 ay ərzində həyata keçiriləcək.

Microsoft-da hazırda əsasən satış bölmələrini əhatə edən daha bir ixtisar dalğası çərçivəsində 3 min 200 nəfər işdən çıxarılır. Bloomberg-in əldə etdiyi əməkdaşlara ünvanlanmış qeyddə İnsan Resursları üzrə direktor Amy Coleman bu ixtisarların məhsulların hazırlanma formasında və müştəri tələblərində baş verən dəyişikliklərdən qaynaqlandığını bildirib.

Bu gün açıqlanan şirkət üzrə planlaşdırılmış ixtisarların ümumi sayı 6 min 400 nəfərə çatır. Bu rəqəm Microsoft-un təxminən 228 min nəfərlik ümumi işçi sayının 3 faizindən azına bərabərdir.

Coleman Microsoft-un daha çox bölməsində bu cür halların baş verəcəyinə işarə edib. O, “Biz bu yolun hələ başlanğıcındayıq və qarşıda daha çox dəyişiklik olacaq; biznesimizin digər bölmələri də oxşar dəyişikliklər etməli olacaq”, - deyib.

Dünyanın ən böyük proqram təminatı istehsalçısı süni intellekt sahəsindəki çalışmalarını dəstəkləmək üçün data mərkəzlərinə böyük həcmdə vəsait xərcləyir. Bu isə şirkətin digər bölmələrində qənaət tədbirlərinə səbəb olur. Microsoft ötən il ümumilikdə təxminən 15 min əməkdaşı əhatə edən iki mərhələli genişmiqyaslı ixtisar dalğası həyata keçirmişdir.

İş elanları AzVak.az-da